اسلام آباد۔24اگست (اے پی پی) وزیر خارجہ مخدوم شاہ محمود قریشی نال آسٹریلیا کیتے پاکستان دے نامزد ہائی کمشنر زاہد حفیظ چوہدری منگل کوں وزارت خارجہ اچ ملاقات کیتی۔ وزیر خارجہ بطورِ ہائی کمشنر آسٹریلیا تعیناتی تے زاہد حفیظ چوہدری کوں مبارخ ݙتی اتے آکھیا جو پاکستان اتے آسٹریلیا وچال ݙو پاسہ تجارت سودھے مختلف شعبیاں اچ تعاون ودھاوݨ دے ٻہوں موقع موجود ہن۔ شاہ محمود قریشی آکھیا جو میکوں توقع اے جو تساݙی بطور ہائی کمشنر تعیناتی نال ݙو پاسہ مراسم ٻئے ودھسن۔ وزیر خارجہ بطورِ ترجمان دفتر خارجہ زاہد حفیظ چوہدری دی خدمات دی تعریف کیتی۔ زاہدحفیظ چوہدری توصیفی کلمات تے وزیر خارجہ دا شکریہ ادا کیتا۔
