نامور صحافی غنی چوہدری کوں دفنا ݙتا ڳئے، نمازجنازہ وچ اہم شخصیات دی شرکت،ڈاکٹر اختر ملک اتے جاوید ہاشمی دی تعزیت

ملتان۔27اگست (اے پی پی):نامور صحافی ،ایسوسی ایٹڈ پریس آف پاکستان دے سابق ایگزیکٹو ڈائریکٹر اتے ملتان پریس کلب دے سابق صدرغنی چوہدری کوں جمعے دے ݙینھ دفنا ݙتا ڳئے۔ انہاں دی نماز جنازہ اچ نامور سیاستداناں، وکلا، ماہرین طب، ڈاکٹراں اتے صحافیاں سودھے زندگی دے مختلف شعبیں نال تعلق رکھݨ آلے لوکاں دی وݙی تعداد شرکت کیتی ۔نماز جنازہ اچ جیڑھی اہم شخصیات شریک تھئن انہاں اچ سینئر سیاستدان مخدوم جاوید ہاشمی، سابق وفاقی وزیر مخدوم تنویر الحسن گیلانی ، ملک جمال لابر، نامور ماہر امراض چشم ڈاکٹر نوید صادق، سینئر صحافی رشید ارشد سلیمی، مسیح اللہ جامپوری، مظہر جاوید، قاضی افتخاراحمد، رفیق ملک، ظہیر کمال، شہزاد چوہدری، رضی الدین رضی،جاویداقبال، جہانگیر خان ترین، عاطف اسماعیل،عطا الہادی،شیخ ظفراقبال، شیخ اشفاق سودھے اے پی پی ملتان دے موجودہ اتے سابق کارکن وی شامل ہن۔ مرحوم دی قل خوانی ہفتے 28اگست کوں انہاں دی رہائش جمیل آباد ہاوسنگ سکیم گیٹ نمبر2تے ادا کیتی ویسی ۔ دعا سویلے ݙاہ وڄے تھیسی ۔ ایندے توں انڄ وزیر توانائی پنجاب ڈاکٹر اخترملک غنی چوہدری دے انتقال تے ݙکھ تے افسوس کیتے اتے انہاں دی صحافتی خدمات کوں خراج عقیدت پیش کیتے ۔مخدوم جاوید ہاشمی آکھیے جو انہاں دی صحافتی خدمات ہمیشہ یاد رکھیاں ویسن ۔