اسلام آباد۔27اگست (اے پی پی):وفاقی وزیر خزانہ و محصولات شوکت ترین آکھیے جو حکومت جامع اتے پائیدار اقتصادی بڑھوتری تے سفر تے ٹردی پئی اے ، قومی معیشت دے اہم اشاریے بہتری دی عکاسی کریندے پئن، اقتصادی مشاورتی کونسل دے مختلف گروپاں دی طرفوں پیش کیتی ڳئی سفارشات اتے پالیسیاں تے عمل درآمد کیتے پاکستان انسٹی ٹیوٹ آف اکنامک ڈویلپمنٹ پائیڈ توں ماہرین گھن ویسوں ، اے ماہرین مختلف وزارتاں دے نال تعاون کریسن تے انہاں گروپاں دے مقرر کیتے ڳئے اہداف تے پیشرفت بارے وزیراعظم کوں ماہانہ پریزنٹیشن ݙتی ویسی ، منصوبہ بندی دے بغیر پائیدار ترقی اتے بڑھوتری دے اہداف حاصل نی کیتے ونڄ سڳدے ، 1972ء دے بعد پہلی واری ملکی تاریخ اچ مختلف شعبیں اچ بڑھوتری کیتے جامع منصوبہ بندی کیتی ویندی پئی اے ۔ جمعے کوں اتھاں وفاقی وزیر قومی غذائی تحفظ و تحقیق سیّد فخر امام، وزیر صنعت و پیداوار مخدوم خسرو بختیار، وزیراعظم دے مشیر سرمایہ کاری و تجارت عبدالرزاق دائود، وزیراعظم دے مشیر ادارہ جاتی اصلاحات ڈاکٹر عشرت حسین اتے اقتصادی مشاورتی کونسل دے بئے ارکان دے رلے پریس کانفرنس کریندے ہوئیں وفاقی وزیر خزانہ شوکت ترین آکھیے جو 1972ء دے بعد پہلی واری منظم انداز اچ قومی معیشت دے اہم شعبیں دے حوالے نال منظم منصوبہ بندی کیتی ڳئی اے ، قومی اقتصادی مشاورت کونسل اچ نجی شعبہ دے سٹیک ہولڈرز کوں رلایا ڳئے ، اساں 14 ترجیحی شعبیں دی نشاندہی کیتی تے انہاں کیتے مختصر، درمیانے اتے لمبی مدت پالیسیاں تے اہداف دا تعین کیتے۔ انہاں آکھیے جو اقتصادی مشاورتی کونسل دے مختلف گروپاں دی طرفوں پیش کیتی ڳئی سفارشات اتے پالیسیاں تے عملدرآمد کیتے پاکستان انسٹی ٹیوٹ آف اکنامک ڈویلپمنٹ(پائیڈ) توں ماہرین گھن ویسوں اے ماہرین مختلف وزارتاں نال تعاون کریسن ۔
