اسلام آباد۔3ستمبر(اے پی پی)صدر مملکت ڈاکٹر عارف علوی آندے انٹخابات کوں ٻیا شفاف، محفوظ اتے غیر جانبدار ٻݨاوݨ کیتے انتخابی عمل اچ اصلاحات متعارف کراوݨ لو ہک جامع طریقہ کار اپناوݨ تے زور ݙتے۔ اے ڳالھ انہاں اسلام آباد اچ انتخابی اصلاحات دے حوالے نال ہک اجلاس دی اڳواݨی کریندے آکھی۔ انہاں آکھیا جو ساریاں سیاسی جماعتاں اتے فریقین ملک اچ انتخابی نظام تکڑا کرݨ کیتے آپݨیاں قومی ذمہ داری نبھاون، آئی ووٹنگ دے تحت انتخابات اچ بیرون ملک وسݨ آلے پاکستانیاں دی شمولیت یقینی ٻݨائی ونڄے جو او آپݨے ووت دا درست استعمال کر سڳن۔ اجلاس اچ وفاقی وزیر برائے اطلاعات و نشریات چوہدری فواد حسین، وفاقی وزیر سائنس و ٹیکنالوجی سینیٹر سید شبلی فراز، وفاقی وزیر ریلوے سینیٹر اعظم خان سواتی، وزیر اعظم دے مشیر برائے پارلیمانی امور ظہیر الدین بابر اعوان اتے سرور باری موجود ہن۔ اجلاس اچ انتخابای اصلاحات سانڳے تجویزاں، ای وی ایم مشیناں دے درست استعمال سودھا سیاسی جماعتاں اتے ٻئے فریقاں نال مشاورت دی پیشرفت دا جائزہ ڳھدا ڳیا۔ صدر مملکت ہدایت کیتی جو کہیں وی سیاسی فیدے توں ہٹ تے صرف پاکستانی عوام دے بنیادی سیاسی حقوق کیتے رل مل تے کم کیتا ونڄے۔
