افغانستان دی نویں عبوری حکومت دا اعلان، ملا حسن اخوند سربراہ، ملا عبدالغنی برادر نائب سربراہ مقرر

کابل۔7ستمبر(اے پی پی)افغانستان دی نویں عبوری حکومت دا اعلان کر ݙتا ڳئے، ملا حسن اخوند افغان حکومت دے اڳواݨ ڄݙاں جو ملا عبدالغنی برادر نائب اڳواݨ ہوسن، ملا عبدالغنی برادر اتے مولانا عبدالسلام امارات اسلامیہ دے سربراہ دے معاون ہوسن۔ ترجمان افغان طالبان ذبیح اللہ مجاہد پریس کانفرنس کریندے آکھیے جو اے عبوری حکومت اے جیندے اچ کہیں ویلھے وی تبدیلی کیتی ونڄ سڳدی اے، نویں حکومت کہیں لسانی گروہ دی نئیں سارے عوام دی نمائندہ اے، ملک اچ بالکل امن قائم اے اتے وادی پنجشیر اچ وی حالات معمول تے آڳین۔انہاں آکھیا جو افغانستان اچ مرضی صرف افغانیاں دی چلسی اتے اڄ دے بعد کوئی وی افغانستان اچ دخل نہ ݙے سڳسی۔ 33 رکنی افغان کابینہ دا اعلان کریندے انہاں آکھیا جو افغان کابینہ اچ ملا ہدایت اللہ بدری وزیر مالیات، سراج حقانی وزیر داخلہ، مولوی یعقوب مجاہد وزیر دفاع، ملا محمد خیر اللہ خیرخواہ وزیر اطلاعات، قاری دین محمد حنیف وزیر اقتصادی امور وکان کنی، ملا امیر خان متقی وزیر خارجہ اتے شیر محمد عباس استانکزئی نائب وزیر خارجہ، شیخ مولوی محمد ثاقب وزیر مذہبی مور و حج ہوسن ڄݙاں جو مولوی محمد عبدالحکیم افغان عدلیہ دے سربراہ ہوسن۔ صحیح الدین بدخشانی کوں افغان فوج دا سربراہ مقرر کیتا ڳئے۔