کراچی۔11ستمبر (اے پی پی):بابائے قوم بانی پاکستان قائداعظم محمد علی جناح دے ورھیݨے دے موقع تے گورنرسندھ عمران اسماعیل اتے وزیراعلی سندھ سید مراد علی شاہ بانی پاکستان دے مزار تے حاضری ݙتی، پھلاں دیاں چادراں چڑھائیاں تے فاتحہ پڑھی۔ وزیراعلی ہاوس توں جاری اعلامیہ موجب بعد اچ وزیراعلی سندھ سید مراد علی شاہ ڳال کریندے ہوئیں آکھیے جو اساں بابائے قوم کوں بھرپور خراج عقیدت پیش کریندوں ۔ وزیراعلی سندھ آکھیے جو بابائے قوم قائداعظم محمد علی جناح پاکستان کوں ھک پرامن اتے جمہوری قوم بݨاوݨ کیتے قائم کیتا ہئی ، اساکوں قائد دے مشن کوں ایندے رہنما اصولاں تے عمل کریندے ہوئیں اڳوں ودھݨا اے ۔ سید مراد علی شاہ مزید آکھیے جو اساکوں آپݨے کشمیری بھراویں کوں وی یاد رکھݨا چاہیدے جیڑھے بھارتی قبضے اتے جارحیت دے خلاف مسلسل جدوجہد کریندے پئن ۔
