اسلام آباد۔9ستمبر (اے پی پی) پاکستان بھارتی قابض فورسز ولوں مقبوضہ جموں و کشمیر اچ وݙے پیمانے تےجنگی جرائم،انسانی حقوق دیاں خلاف ورزیاں،نقلی مقابلیں،نقلی فلیگ آپریشنز اتے تریمتاں دی بیحرمتی بارے جامع ڈوزیئر جاری کرݙتا ۔ وزیر خارجہ مخدوم شاہ محمود قریشی اتوار کوں وفاقی وزیر انسانی حقوق شیریں مزاری اتے مشیر قومی سلامتی معید یوسف دے رلے مشترکہ پریس کانفرنس اچ 131صفحات تے مشتمل ڈوزیئر دی تفصیلات بارے ݙسیندے ہوئیں آکھیے جو اساں ایں ڈوزیئردے ذریعے پوری معلومات اتے اصل حقائق ساری دنیا تئیں پڄیسوں ،اساں دنیا دی ساریں توں وݙی جمہوریت دے دعویدار بھارت سرکار دے اصل چہرے کوں بے نقاب کرݨ دا فیصلہ کیتے ۔انسانی حقوق دیاں خلاف ورزیاں مقبوضہ کشمیر اچ کوئی نویں ڳال کائنی ۔بھارت مقبوضہ کشمیر اچ ظلم دی انتہا کریندے ہوئیں کشمیری عوام دا جیوݨ محال کرݙتے ، جݙاں توں ہندتوا حکومت بھارت اچ آئی اے انہاں پامالیاں اچ ودھارا تھی ڳئے اڄ بھارتی فوجی محاصرے کوں 769 ݙینھ تھی ڳئن ، انہاں آکھیے جو سید علی گیلانی دا یکم ستمبر کوں جݙاں انتقال تھئے تاں انہاں دے گھر دا محاصرہ کیتا ڳئے ،انہاں دی وصیت کوں بالائے طاق رکھیندے ہوئیں انہاں کوں رات دے اندھارے اچ دفن کیتا ڳئے ، انہاں کوں تدفین دے بنیادی حق توں وی محروم کیتا ڳئے تے انہاں دے خاندان تے انہاں دے رشتے داراں کوں جنازے اچ شرکت توں محروم رکھیا ڳئے ، بین الاقوامی میڈیا کوں مقبوضہ کشمیر اچ رسائی نی ݙتی ویندی ،انسانیت کوں ایں انداز اچ پامال کرݨ ٻہوں نامناسب اے اساں ایں سانڳے اڄ ڈوزیر سامݨے گھن آوݨ دا فیصلہ کیتے ۔ شاہ محمود قریشی آکھیے جو 131 صفحیں تے مشتمل ایں ڈوزیر دے ترائے باب ہن۔پہلے باب اچ جنگی جرائم، ݙوجھے اچ فالس فلیگ آپریشنز جݙاں جو تریجھے باب اچ سلامتی کونسل دیاں قرارداداں تے بھارت دی مقبوضہ کشمیر دی جغرافیائی حیثیت بدالݨ دیاں کوششاں دا ذکر اے ، انہاں آکھیے جو ایندے وچ 113 حوالے موجود ہن جنہاں اچ 26 بین الاقوامی میڈیا توں تے 41 حوالے بھارت دے تھنک ٹینکس تے ڳھدے ڳئن جݙاں جو پاکستان دے صرف 14 حوالے ہن ،اے ٻہوں بااعتماد دستاویز بݨایا ڳئے،3232 کیسز جنگی جرائم متعلق ہن۔1128 انہاں لوکاں دی نشاندہی کیتی ڳئی اے جنہان اچ بھارتی میجرجنرل، بریگیڈیئر و ٻئے سینیئر افسران دا تذکرہ اے جیڑھے جو انسانی حقوق دیاں پامالیاں اچ براہ راست ملوث رہ ڳئن ،انہاں وچ ماورائے عدالت قتل، پیلٹ گنز دا استعمال شامل اے۔انہاں آکھیے جو ایں ڈوزیئر اچ تریمتان دی بے حرمتی دا تذکرہ اے،ھک لکھ توں ودھ ایجھی املاک دا ذکر اے جنہاں کوں ساڑیا ڳئے ایندے علاوہ پاکستان کوں بدنام کرݨ کیتے فیک آپریشنز دا تذکرہ اے۔
