ملتان۔13ستمبر (اے پی پی):پاکستان تحریک انصاف جنوبی پنجاب دے نویں منتخب صدر سینیٹر عون عباس بپی آکھیے جو جنوبی پنجاب دے سارے ضلعیں اچ ورکرز کنونشن دا انعقاد کرتے منتخب نمائندیں ، ضلعی عہدیداران اتے کارکنان وچال ہم آہنگی پیدا کرݨ میݙی ترجیحات اچ شامل اے۔آندے بلدیاتی انتخابات اچ بھرپور کامیابی حاصل کرتے پاکستان تحریک انصاف ھک واری ول ثابت کرݙیسی جو او ملک دی مقبول ترین جماعت اے۔وزیرخارجہ شاہ محمودقریشی دے نال رل تے کم کرݨ نال جنوبی پنجاب دی عوام کوں فیدہ تھیسی ۔متحرک ،باصلاحیت نینگر نہ صرف تحریک انصاف بلکہ ملک دا بہترین سرمایہ ہن ۔ عمران خان ھک سوچ، نظریئے اتے فلسفے دا ناں اے ، اے ڳالھیں انہاں ’’اے پی پی ‘‘نال خصوصی ڳال مہاڑ کریندے ہوئیں آکھئن ۔عون عباس بپی آکھیے جو میں وزیراعظم عمران خان دا دلوں مشکورہاں۔انہاں میں تے اعتماد کریندے ہوئیں جنوبی پنجاب داصدر چݨیے ، انہاں آکھیے جو میکوں کارکنان ،منتخب نمائندیں اتے ضلعی عہدیداران وچال بہترین ہم آہنگی اتے رابطہ قائم کرݨ دا ٹاسک ݙتا ڳئے ایں مقصد کیتے میں آپݨی ساریاں صلاحیتاں کوں استعمال کریساں جیں کیتے ہر ہفتے کوں جنوبی پنجاب دے سارے ضلعیں وچ ورکرز کنونشن دا انعقاد کریسوں ۔انہاں آکھیے جو ایں کنونشن اچ متعلقہ ضلع دے منتخب نمائندے ، ضلعی عہدیداران اتے کارکنان دے علاوہ ضلعی انتظامیہ موجود ہوسی اتےموقع تے ہی کارکنان اتے عوام کوں پیش آندے مسئلیں دا ازالہ کیتا ویسی ، انہاں آکھیے جو ایں سلسلے اچ 18ستمبر کوں بہاولپور اچ ورکرز کنونشن دا انعقاد کیتا ویسی ۔عون عباس بپی آکھیے جو اے ڳال درست اے جو پاکستان تحریک انصاف دی حکومت برسراقتدارآوݨ توں بعد حکومت سازی دے عمل اتے عوام کوں بہترتوں بہتر ریلیف ݙیوݨ دی مصروفیات پاروں اساں آپݨے کارکنان کوں او وقت نی ݙے سڳے جیڑھا انہاں دا حق ہئی تے ہݨ انہاں دیاں شکایتاں دا ازالہ تھیسی ۔سینیٹر عون عباس بپی آکھیے جو میݙی وزیرخارجہ مخدوم شاہ محمودقریشی دے ںال تفصیلی ملاقات تھئی اے تے اساں ایں ڳال دا عزم کیتے جو جنوبی پنجاب دیاں محرومیاں مکاوݨ کیتے اساں ݙوہیں رلے کم کریسوں ، انہاں آکھیے جو وزیراعظم عمران خان ھک سوچ، ھک نظریئے اتے فلسفے داناں اے ۔ او ملک دی بہتری کیتے ݙینھ رات کم کریندے پئن تے 70سال دا کچرا صاف کرݨ اچ مصروف ہن ، عمران خان چور، لیٹریں تے کرپشن دے خلاف جنگ دا جیڑھا عزم کررکھیے ایندے سپاہی ساݙے کارکنان وی ہن ۔ انہاں آکھیے جو پاکستان تحریک انصاف 2023 دے الیکشن باری اکثریت ںال جت ویسی ، حکومت مہانگ تے قابو پاوݨ ،روزگار دے موقع بݨاوݨ کیتے اقدامات کریندی پئی اے ، انہاں آکھیے جو مسلم لیگ (ن) جنوبی پنجاب صوبے دے قیام دے حوالے ںال جیڑھی شرارت شروع کیتی اساں اینکوں ختم کریندے پیوں تے بہاولپور اتے ملتان اچ انڄ انڄ سیکرٹریٹ قائم کیتے ویندے پئن ، ایندے توں انڄ پنجاب حکومت محرومیاں مکاوݨ کیتے جنوبی پنجاب دا انڄ بجٹ رکھیے ، واضح رہے جو عون عباس بپی پاکستان تحریک انصاف جنوبی پنجاب دے صدر منتخب تھیوݨ توں بعد جݙاں ملتان پڄے تاں کارکنان انہاں دا شاندار استقبال کیتا، ۔ملتان دے بعد عون عباس بپی ضلع بہاولنگر دا دورہ کرتے ڈسٹرکٹ کوارڈنیشن کمیٹی دے اجلاس اچ شرکت کیتی جیندے وچ چیف آرگنائزر پاکستان تحریک انصاف سینیٹر سیف اللہ خان نیازی ،ممبر قومی اسمبلی میاں عبدالغفار، صوبائی وزیرعشر وزکوة میاں شوکت علی لالیکا، انفارمیشن سیکرٹری جنوبی پنجاب سہیل خان دے علاوہ ٻعے ضلعی عہدیداراں شرکت کیتی۔ اجلاس اچ ترقیاتی سکیماں کوں ویلھے سر توڑ پڄاوݨ کیتے سارے اقدامات کرݨ دی ہدایت کیتی ڳئی ،عون عباس بپی آکھیے جو جنوبی پنجاب وچ جاری ترقیاتی منصوبیں کوں وختی مکمل کیتا ونڄے تاں جو عوام دی زندگی وچ سوکھ ݙتی ونڄ سڳے ۔
