ملتان۔20ستمبر (اے پی پی):سیکرٹری صحت جنوبی پنجاب محمد اجمل بھٹی آکھیے جو جنوبی پنجاب کوں مستقل طورتے پولیو توں پاک بݨاوݨ تے لوکاں کوں صحت عامہ دیاں بہتر سہولتاں ݙیوݨ اولین ترجیح اے ، پولیو مہم دے دوران جنوبی پنجاب اچ 5 سال توں گھٹ عمر دا کوئی ٻال وی پولیو توں بچاوݨ دے قطرے پیتے بغیر نی رہݨا چاہیدا ۔ انہاں 5 ݙینھ وار انسدادِ پولیو مہم دے آغاز دے حوالے نال منعقدہ اجلاس توں خطاب کریندے ہوئیں آکھیے جو انسدادِ پولیو مہم 20ستمبر توں 24ستمبر تئیں پورے ملک اچ وانڳوں جنوبی پنجاب دے سارے 11 ضلعیں اچ وی جاری رہ ویسی ، ایں حوالے نال سیکرٹری صحت جنوبی پنجاب محمد اجمل بھٹی ݙسائے جو ایں مہم اچ 5 سال توں گھٹ عمر دے 65لکھ 53ہزار447 ٻالاں کوں پولیو دے قطرے پلائے ویسن جیں اچ 23ہزار318ٹیماں حصہ گھنسن ۔
