افغانستان اچ استحکام اتے امن دے قیام کیتے وزیراعظم عمران خان دیاں کوششاں قابل ستائش ہن ، موجودہ حکومت کوں عبوری تصور کیتا ونڄے ، افغانستان اچ داعش تنظیم دی شکل اچ موجود کائنی، افغانستان دےنائب وزیر اطلاعات ذبیح اللہ مجاہد دی پریس کانفرنس

کابل۔21ستمبر (اے پی پی):افغانستان دےنائب وزیر اطلاعات ذبیح اللہ مجاہد آکھیے جو پاکستان افغانستان دے اندرلے معاملات اچ مداخلت نی کریندا پیا تے افغانستان اچ استحکام اتے امن دے قیام کیتے وزیراعظم پاکستان عمران خان دیاں کوششاں قابل ستائش ہن اینکوں مداخلت دی نظر نال نہ ݙٹھا ونڄے ، افغانستان اچ داعش تنظیم دی شکل اچ موجود کائنی ۔ منگل کوں افغانستان دے دارالحکومت کابل اچ پریس کانفرنس دے دوران انہاں آکھیے جو موجودہ حکومت کوں عبوری حکومت تصور کیتا ونڄے ، کابینہ دی تشکیل مکمل کائنی تھئی حالی ایندے وچ مزید لوکاں کوں رلیسوں ، اساں ھک مشترکہ اتے جامع حکومت دی تشکیل دے پاسے ودھدے پیوں تریمتاں کوں وی اہم عہدے ملسن ،ٻالڑیاں کیتے سکول کھول ݙتے ویسن ، انہاں آکھیے جو عبوری کابینہ اچ مختلف مسلک توں تعلق رکھݨ آلے لوکاں کوں رلایا ڳئے جنہاں اچ او ہزارہ اتے ٻئی قوم توں تعلق رکھݨ آلے لوک ، ٹیکنو کریٹس اتے تعلیم یافتہ لوک شامل ہن۔ انہاں آکھیے جو بین الاقوامی برادری افغانستان دی حکومت کوں منے ، افغان حکومت کوں منیے بغیر محض تنقید کرݨ یکطرفہ نقطہ نظر اے۔انہاں ھک سوال دے جواب اچ آکھیے جو افغانستان اچ استحکام اتے امن دے قیام کیتے وزیراعظم عمران خان دیاں کوششاں قابل ستائش ہن جیڑھی اہم پیش رفت اے اینکوں مداخلت دی نظر ںال نہ ݙٹھا ونڄے ، انہاں آکھیے جو قطر، پاکستان اتے چین جیہے ملکاں افغانستان اچ استحکام دیاں کوششاں کیتے سرگرم ہن،طالبان چاہندن جو افغانستان اچ کوئی ٻاہرلی مداخلت نہ ہووے مگر تعاون دا خیرمقدم کریسوں ۔ انہاں افغانستان اچ حکومت دے حوالے نال پاکستان دے وزیراعظم عمران خان دے بیان تے مثبت ردعمل دا اظہار کریندے ہوئیں آکھیے جو پاکستان، قطر اتے جیڑھے وی ملک افغانستان اچ امن چاہندن او افغانستان اچ جاری سیاسی پیش رفت دی تائید کریندن تے اساں قطر اتے بئے ملکاں ںال رابطے وچ ہیسے ۔