اسلام آباد۔22ستمبر (اے پی پی):وزیراعظم عمران خان آکھیے جو اساں تبدیلی دے مخالف سارے مافیاز دے سامݨے کھڑوں، کرپٹ سسٹم توں فیدہ چاوݨ آلے الیکٹرانک ووٹنگ مشین دی مخالفت کریندے پئن، ،ای وی ایم پاکستان دے مسئلے حل کرݙیسی ، آندے ݙو سال حکومت کیتے ٻہوں اہم ہن ، اساکوں آپݨے اہدف حاصل کرݨن، ساریاں وزارتاں محنت کرن۔ اے ڳال انہاں ٻدھ کوں اتھاں کارکردگی معاہدیں تے دستخط دی تقریب توں خطاب کریندے ہوئیں آکھی اے ، ایں موقع تے وفاقی وزیر اطلاعات و نشریات چوہدری فواد حسین ، وفاقی وزیر سائنس اینڈ ٹیکنالوجی سینیٹر شبلی فرا ز، وزیراعظم دے معاون خصوصی اسٹیبلشمنٹ ارباب شہزاد سودھے وفاقی وزرا ، معاونین خصوصی و مشیران ، وفاقی محکمیں دے سیکرٹریز اتے اعلیٰ حکام موجود ہن ۔ تقریب توں خطاب کریندے ہوئیں وزیراعظم آکھیے جو آندے ݙو سال کیتے آپݨے اہداف مقرر کرݨاضروری ہئی۔ ایندی مانیٹرنگ وی کیتی ویسی آندے سال اساں کیتے ٻہوں اہمیت رکھیندن ، جے اساں ایں دوران آپݨے ہدف گھن ڳحدے تاں حکومت دے چھیکڑی سال اچ رہ ونڄݨ آلے ہدف کوں وی پورا کرݨ سوکھا تھی ویسی ۔ وزیراعظم آکھیے جو انہاں کوں ٹیم چلاوݨ دا تجربہ ہے پیا تے اے انہاں کرکٹ توں سکھیے۔ ہر جاہ ٹیم کوں چلاوݨ دے اصول ھکو سویں ہوندن ، میں 10 سال کرکٹ ٹیم دا کپتان رہیا تے کھلاڑیاں کوں آندے ویندے ݙٹھا ۔ ہمیشہ او ٹیم کامیاب تھیندی جیڑھی سارا ویلھا آپݨا جائزہ گھندی رہندی اے ، تے او آپݨی کارکردگی تے نظر ثانی کریندی اے ۔ وزیراعظم آکھیے جو تعلیم وی اساکوں آپݨیاں صلاحیتاں دا جائزہ گھنݨ سکھیندی اے ۔ وزیرعظم وزارتاں تے زور ݙتے جیڑھے انہاں آپݨے ہدف مقرر کیتن انہاں کوں حاصل کرن ، وزیراعظم آکھیے جو اوکھے ویلھے ہر من ونجݨ آلے کݙاہیں اڳوں نی ودھدے ۔
