اسلام آباد۔22ستمبر (اے پی پی):وزیراعظم عمران خان سڑکاں دے منصوبیں دی وختی تکمیل کیتے فنڈز دے اجرا دی ہدایت کریندے ہوئیں آکھیے جو معیاری سڑکاں دی تعمیر توں دیہاتی تے شہری علاقیں وچال رابطہ، تجارت اتے روزگاردے موقع ودھسن ، اے ڳال انہاں ٻدھ کوں نیشنل ہائی وے اتھارٹی دے زیر انتظام منصوبیں تے پیشرفت دے جائزہ اجلاس توں خطاب کریندے ہوئیں آکھی اے ۔ اجلاس اچ وفاقی وزیرمواصلات مراد سید، وفاقی وزیرمنصوبہ بندی اسد عمر، معاون خصوصی ڈاکٹر شہباز گل، ڈپٹی چیئرمین منصوبہ بندی کمیشن جہانزیب خان، چیئرمین نیشنل ہائی وے اتھارٹی اتے سینئر افسران شرکت کیتی۔ وفاقی وزیرمواصلات مراد سید اجلاس کوں تقابلی جائزہ پیش کریندے ہوئیں ݙسائے جو سابق حکومت دے ترائے سالاں (16-2013) اچ صرف 645 کلومیٹر دیاں سڑکاں تعمیر تھیاں تے موجودہ حکومت دے ترائے سالاں اچ کل 1753 کلومیٹر لمبائی دیاں سڑکاں مکمل تھئن ۔منصوبہ بندی دے حوالے نال گزریل دور حکومت دے ترائے سالاں اچ صرف 858 کلو میٹر جݙاں جو موجودہ حکومت دے ترائے سالاں اچ 6118 کلومیٹر لمبائی تے مشتمل سڑکاں دی منصوبہ بندی مکمل کر ڳھدی ڳئی اے ۔ وزیراعظم کوں ݙسایا ڳئے جو اڄوکے مالی سال اچ نیشنل ہائی وے اتھارٹی 27 منصوبے مکمل کرگھنسی ، بلوچستان اچ 3000 کلومیٹر توں ودھ سڑکاں بݨدیاں پئن ، وزیر اعظم دے خود انحصاری دے ویژن دے مطابق منصوبے قرضیں دی بجائے پبلک پرائیویٹ پارٹنرشپ دے ذریعے مکمل کیتے ویندے پئن ، اجلاس کوں راولپنڈی توں کھاریاں، میانوالی توں مظفرگڑھ اتے حیدرآباد توں سکھر شہراہواں تے پیشرفت دی تفصیلی بریفنگ ݙتی ڳئی ۔وزیر اعظم عمران خان آکھیے جو معاشی ترقی اچ سڑکاں دا اہم ترین کردار اے۔ انہاں آکھیے جو معیاری سڑکاں دی تعمیر توں دیہاتی تے شہریاں علاقیں وچال رابطہ، تجارت اتے روزگار دے موقع ودھسن ۔
