اسلام آباد۔22ستمبر(اے پی پی)وفاقی وزیرخزانہ شوکت ترین آکھیے جو حکومت کھاوݨ پیوݨ دیاں شئیں تے ہک کروڑ 25 لکھ ٹٻراں کوں براہ راست سبسڈی ݙیندی پئی اے جیڑھا ملکی آبادی دا 40 توں 42 فیصد ٻݨدے۔ قیمتاں ہتھیکے رکھݨ اتے ملکی پیداوار ودھاوݨ دے اقدامات تھیندے پین، ڳھٹ آمدن لوکاں دی آمدن ودھاوݨ تے توجہ اے، کامیاب پاکستان پروگرام ایں مہینے شروع تھیسی، خطے دے ٻئے ملکاں دے مقابلے اچ پیٹرول اتے ٻیاں ضروری اشیا دیاں قیمتیں ڳھٹ ہین۔ اسلام آباد اچ وزیر مملکت اطلاعات ونشریات فرخ حبیب اتے وزیراعظم دے معاون خصوصی غذائی سلامتی جمشید چیمہ نال پریس کانفرنس اچ انہاں آکھیا جو آئی ایم ایف پروگرام پاروں پاکستان دا ڈسکاونٹ ریٹ ودھیئے، روپے دی قدر ڳھٹی اے تہوں قیمتاں ودھن اتے کرونا دے وبا وی مسلے پیدا کیتن، ڈالر دے ودھدے ریت مت ماری اے بھل ایندے باوجود حکومت کاروبار دی ترقی، معیشت تکڑی کرݨ اتے عام لوکاں دا جیوݨ سوکھا کرݨ کیتے عملی اقدامات کیتن، ایندے مثبت نتیجے نکلین، صارفین کیتے قیمتاں دا حساس اشاریہ ݙو سالاں اچ ڳھٹ تے 8.4 فیصد تے آڳئے، اشیائے خوراک دی افراط زر دی شرح شہری علاقیاں اچ اڄ 10 فیصد اتے دیہاتاں اچ 17 فیصد توں ڳھٹ تے 9.1 فیصد تھی ڳئی اے، عالمی منڈی اچ کھنݙ، پام آئل اتے خام تیل دا مل ݙوڑا تھی چکیے بھل ول وی پاکستان اچ قیمتاں ٻہوں ڳھٹ ودھایاں ڳین۔ انہاں آکھیے جو حکومت کوکنگ آئل کیتے ٹیکسآں اچچھؤت دا فیصلہ کیتا ڳئے جیندے بعد فی کلو قیمت 45 توں 50 روپے ڳھٹ ویسی، ایویں پٹرول دا ملھ وی عالمی مارکیٹ دے مقابلے اچ حالی 30 توں 40 فیصد ڳھٹ اے، حکومت پٹرولیم لیوی دے 600 ارب روپے دے ہدف اچوں کڄھ وی نئیں وصول کیتا جو عوام کوںو دھ ریلیف ملے ایندے تے اپوزیشن دا شور بیکار اے، عوام کوں ڳھیو، اٹا، کھنݙ اتے دالاں ڄھیاں ضروری مختلف شئیں تے ودھ سبسڈی ݙتی ویسی۔
