نیویارک/ اسلام آباد۔25ستمبر (اے پی پی) وزیر خارجہ مخدوم شاہ محمود قریشی اقوام متحدہ جنرل اسمبلی دے 76 ویں اجلاس دے موقع تے بیلجیئم دی نائب وزیر اعظم و وزیر خارجہ سوفی ولیمز نال ملاقات کیتی۔ دفتر خارجہ ولوں جاری بیان دے مطابق ملاقات اچ ݙو پاسہ تعلقات اتے افغانستان دی ابھردی ہوئی صورتحال تے ڳالھ مہاڑ کیتی ڳئی۔ گزریل مہینے تھیوݨ آلے ٹیلیفونک ڳالھ مہاڑ دا حوالہ ݙیندیں ہوئیں وزیراعظم خارجہ آکھیا جو پاکستان بیلجیئم کوں یورپی یونین اچ پاکستان دا اہم تجارتی شراکت دار سمجھدے۔ انہاں آکھیا جو پاکستان ، وزیر اعظم عمران خان دے وژن دی روشنی اچ اقتصادی ترجیحات دے ایجنڈے تے توجہ ݙتی ہوئی اے۔؛ مخدوم شاہ محمود قریشی پاکستان اتے بیلجیئم وچال ݙو پاسہ تجارتی تعلقات اتے اقتصادی تعاون کوں ٻیا مستحکم ٻݨاوݨ دی لوڑھ تے زور ݙتا۔ وزیر خارجہ جی ایس پی پلس اسٹیٹس بارے پاکستان دی حمایت تے بیلجیئم دی نائب وزیر اعظم و وزیر خارجہ دا شکریہ وی ادا کیتا۔ ݙوہیں وزرائے خارجہ وچال افغانستان دی صورتحال تے وی ڳالھ مہاڑ تھئی۔
