افغانستان اچ جنگ دے نتیجے تے پاکستان تے الزام نی لاوݨا چاہیدا، سدھا کم اے ھے جو امن اتے استحکام کیتے نویں افغان حکومت نال تعاون کیتا ونڄے، وزیر اعظم عمران خان دا واشنگٹن پوسٹ اچ مضمون

اسلام آباد۔27ستمبر (اے پی پی) وزیر اعظم عمران خان آکھیا جو افغانستان اچ جنگ دے نتیجے تے پاکستان تے الزام نی لاوݨا چاہیدا، سدھا کم اے ھے جو امن اتے استحکام کیتے نویں افغان حکومت نال تعاون کیتا ونڄے۔طالبان حکومت اتے بین الاقوامی برادری وچال رابطہ ساریاں کیتے مثبت نتیجے یقینی ٻݨیسی۔ اے ڳالھیں انہاں سنوار کوں امریکی اخبار واشنگٹن پوسٹ اچ چھپݨ آلے ہک مضون اچ آکھی۔ وزیراعظم لکھیا جو امریکی کانفرنس کوں ݙتی ڳئی بریفنگز اچ امریکی نقصانات کیتے پاکستان تے الزام لاوݨ دے بیانات سݨ تے حیرت تھی اے جڈانجو دہشت گردی دے خلاف جنگ اچ امریکا دے اتحادی ہووݨ دی حیثیت نال پاکستان دی قربانیاں دا کوئی ذکر کائنی کیتا ڳیا۔ میں 2001ء توں ولا ولا خبردار کریندا امداں جو افغان جنگ جتی نی ونڄ سڳدی۔ انہاں آکھیا جو ماضی اچ پاکستان دی حکومتاں قانونی حیثیت کیتے امریکا کوں افغانستان دے معاملے تے خوش کریندی رہن۔ وزیراعظم آکھیا جو اساں آپݨی بقا کیتے لڑے اتے بہترین فوج اتے انٹیلی جنس نظام پاروں دہشت گردی کوں ہرایا۔ وزیراعظم آکھیا جو ترائے لکھ افغان سکیورٹٰی فورسز دے پورے ہتھیار سٹ ݙیوݨ دا الزام پاکساتن تے لاتا ونڄ سڳدے؟ ایں حقیقت کوں منݨ دی بجائے افغان اتے مغربی حکومتاں اتے بھارت دے اندر گھڑی ڳئی جعلی خبراں اچ پاکستان تے الزام لاتا ویندا رہیے۔ انہاں آکھیا جو اگر اساں درست کم کیتاں تاں دہشت گردی توں پاک اتے خوشحال افغانستان دے مقاصد حاصل کر ڳھنسوں۔ پر اساں اگر ماضی وانڳ غلطیاں کیتی تاں افراتفری، مہاجرین دے سیلاب دے نال نال دہشت گردی ودھسی اتے سارے فریق متاثر تھیسن۔