شہباز شریف دے خلاف پاکستان اچ منی لانڈرنگ دے مقدمات ، برطانیہ اچ کوئی مقدمہ کائنی ٻݨایا ڳیا، میڈیا اچ انہاں دی بریت دا تاثر درست کائنی، مشیر برائے داخلہ واحتساب شہزاد اکبر

اسلام آباد۔28ستمبر (اے پی پی) وزیراعظم دے مشیر برائے داخلہ واحتساب شہزاد اکبر آکھیا جو شہباز شریف دے خلاف پاکستان اچ منی لانڈرنگ دے مقدمات ، برطانیہ اچ کوئی مقدمہ کائنی ٻݨایا ڳیا، میڈیا اچ انہاں دی بریت دا تاثر درست کائنی۔ اے ڳالھیں انہاں منگل کوں صحافیاں نال ڳالھ مہاڑ کریندیں ہوئیں آکھی۔ انہاں آکھیا جو برطانیہ دی نیشنل کرائم ایجنسی سلمان شہباز دے 2 اکائونٹس منجمند کیتے ہن اتے ہݨ انہاں کوں بحال کر ڈتا ڳئے، نیشنل کرائم ایجنسی شک دی بنیاد تے کوئی وی اکائونٹ 12 مہینے کیتے بند کر سڳدی اے۔ انہاں آکھیا جو شہباز شریف دے خلاف برطانیہ اچ منی لانڈرنگ بارے کوئی مقدمہ کائنی ٻݨایا ڳیا، اے سلمان شہباز دا معاملہ ہئی۔ شہباز شریف توں انہاں دے ٻالاں بارے پچھیا ونڄے تاں او ایں بارے لاتعلقی دا اعلان کریندن۔ انہاں آکھیا جو شہباز شریف دے خلاف ست ارب روپے دی منی لانڈرنگ دا مقدمہ احتساب عدالت لاہور اچ زیر سماعت ات جئیں اچ 12 گواہ عدالت اچ پیش تھی ڳئن، باقی گواہ اڄاں پیش تھیوݨ اتے ایندا فیصلہ عدالت کرݨے۔ انہاں آکھیا جو شہباز شریف ، حمزہ شہباز اتے مفرور سلمان شہباز دے خلاف 25 ارب روپے دا مقدمہ چلدا پئے۔