اسلام آباد۔28ستمبر(اے پی پی)وزیر خارجہ مخدوم شاہ محمود قریشی امید کیتی اے جو برطانیہ، کشمیریاں کوں بھارتی ظلم توں بچاوݨ اتے “حق خود ارادیت” کیتے اپݨا کردار ادا کریسی، عالمی برادری، افغانستان کوں انسانی بحران توں بچاوݨ کیتے انسانی و مالی امداد ݙیوے۔ او لندن اچ اپݨے برطانوی ہم منصب ا لِزبتھ ٹرس نال ملݨ ویلھے الیندے پئے ہن۔ انہاں ݙوطرفہ تعلقات، کثیرالجہتی شعبیاں اچ تعاون، علاقائی سلامتی سودھا ٻئے عالمی معاملیاں خاص کر افغانستان دی اڄوکی صورتحال تے الایا۔ وزیر خارجہ برطانوی ہم منصب کوں مقبوضہ جموں و کشمیر اچ جاری بھارتی مظالم اتے خطے دے امن کوں خطریاں بارے ݙسیا۔ وزیر خارجہ آکھیے جو افغانستان دی صورتحال ݙیہدے ہوئے اتھاں کوئی نواں انسانی بحران تھیوݨ توں بچاوݨ دی لوڑھ اے، ایں سانڳے عالمی برادری اپݨا کردار ادا کرے۔ وزیر خارجہ پاک- برطانیہ، اسٹریٹیجک مذاکرات دے پنڄویں جائزہ اجلاس سانڳے برطانوی وزیر خارجہ کوں دورہ پاکستان دی دعوت ݙتی ڄیڑھی انہاں من ڳھدی۔
