اسلام آباد۔10اکتوبر (اے پی پی) پاکستان دے نامور ایٹمی سائنسدان اتے محسن پاکستان ڈاکٹر عبدالقدیر خان دی نماز جنازہ فیصل مسیت اچ پڑھائی ڳئی ۔ ڈاکٹر عبدالقدیر خان دے جسد خاکی کوں قومی پرچم اچ ولھیٹ تے قومی اعزاز دے نال فیصل مسیت اچ آندا ڳیا جتھاں پروفیسر ڈاکٹر احمد الغزالی محسن پاکستان ڈاکٹر عبدالقدیر خان دی نماز جنازہ پڑھائی۔ قائم مقام صدر چیئرمین سینیٹ صادق سنجرانی ، کابینہ اراکین ، اراکین پارلیمان ،سول تے عسکری حکام سمیت لوکاں دی وݙی تعداد نماز جنازہ اچ شرکت کیتی۔ انہاں دی پسماندگان اچ بیوہ اتے ݙو دھیریں شامل ہن۔ نمازہ جنازہ دے موقع تے سکیورٹی دے سخت انتظامات کیتے ڳئے ہن۔ محسن پاکستان ڈاکٹر عبدالقدیر خان کوں ایچ ایٹ دے قبرستان اچ قومی اعزاز نال دفن کیتا ڳیا۔
