دبئی۔11اکتوبر(اے پی پی)آئی سی سی ٹی ٹونٹی ورلڈ کپ کیتے بھاری انعامی رقم دا اعلان کرڈتے۔ میگا ایونٹ وچ حصہ گھنݨ آلے سارے سولہاں ٹیماں اچ کل 56 لکھ ڈالرز ونڈیسن۔ ٹورنامنٹ جیتݨ آلی ٹیم 16 لکھ ڈالرز وٹھیسی۔ اے رقم پاکستانی کرنسی اچ گھٹ ودھ 27 کروڑ 2 لکھ روپے بنݨدن۔ رنرز اپ سائیڈ کوں اٹھ لکھ ڈالرز ملسن جیڑھے پاکستانی کرنسی اچ تیرہ کروڑ 66 لکھ روپے بنݨدن۔ سیمی فائنل اچ ہرݨ آلیاں ݙوہیں ٹیماں کوں چار، چار لکھ ڈالرز ملسن ۔ سپر بارہاں راؤنڈ کیتے ہک لکھ 20 ہزار ڈالرز رکھیے ڳین۔ ہر میچ دی فاتح ٹیم کوں 40 ہزار ڈالرز ݙتے ویسن ۔ سپر 12 مرحلے اچ ناک آؤٹ تھیوݨ آلیاں ٹیماں کیتے پنڄ لکھ سٹھ ہزار ڈالرز رکھیے گین اتے ہر ٹیم کوں 70ہزار ڈالرز ملسن۔ ابتدائی راؤنڈ وچ میچ جیتݨ آلی ٹیم کوں 40 ہزار ڈالرز ݙتے ویسن۔ جیکر سپر 12 راؤنڈ وچ ناقابل شکست رہندے ہوئے کوئی ٹیم ورلڈکپ دی فاتح ہوئی تاں اوندے اکاؤنٹ وچ پاکستانی کرنسی دے مطابق 32 کروڑ روپے توں ودھ رقم ویسی۔
