اسلام آباد۔14اکتوبر(اے پی پی)وزیراعظم دے معاون خصوصی موسمیاتی تبدیلی ملک محمد امین اسلم آکھیے جو وزیراعظم عمران خان کلائمیٹ چینج کونسل میٹنگ اچ پنڄ اہم فیصلے کیتن جیڑھے قومی ماحولیاتی وژن اچ وݙی اہمیت رکھدن، پورا ڄڳ اڄ پاکستان دی موسمیاتی تبدیلی نال نبݨݨ دے اقدامات دی تعریف کریندا پئے۔ اے ڳالھ انہاں پریس کانفرنس اچ آکھی۔ انہاں آکھیا جو وزیراعظم قومی سطح تے حکمت عملی دی دستاویز این ڈی سی دی منظوری ݙتی اے، پورا ڄڳ اڄ پاکستان دی موسمیاتی تبدیلی نال نبݨݨ دے اقدامات دی تعریف کریندا پئے، جرمنی، سعودی عرب، متحدہ عرب امارات اتے ٻئے ملک گرین ہائوسز دے اخراج اچ کمی، ماحولیاتی آلودگی اتے عالمی حدت تے قابو پاوݨ سانڳے پاکستان نال 10 ارب درخت سونامی پروگرام آلی کار ساڄھے داری چاہندن، سعودی عرب 25 اکتوبر کوں تھیوݨ آلے عالمی سربراہ اجلاس نال خطاب کیتے وزیراعظم عمران خان کوں سݙا ݙتے جتھاں او سعودی عرب دی عالمی ماحولیاتی کانفرنس دے افتتاح اچ شرکت کریسن۔ انہاں آکھیا جو عالمی بنک وی پاکستان دے این ڈی سی اتے ماحول دوست ترقی دے وژن سانڳے تعاون دی پیش کش کیتی اے، پاکستان اپنی مدد آپ دے تحت 15 فیصد گرین ہائوس گیسز دے اخراج اچ 2030ء تئیں 5 فیصد کمی سانڳے عالمی ڳانݙھا چاہندے جیندے کیتے 100 ارب ڈالر دی لوڑھ اے۔ انہاں آکھیا جو کونسل پاکستان دی پہلی کلائمیٹ چینج پالیسی دی تجدید نو دی منظوری ݙتی اے جیڑھی کابینہ توں منظور کرائی ویسی۔ اجلاس ملک دی پہلی قومی جنگلی حیات دے تحفظ دی پالیسی دی وی منظوری ݙتی اے۔
