اسلام آباد۔15اکتوبر (اے پی پی) انٹرنیشنل کرکٹ کونسل (آئی سی سی) ولوں ستواں آئی سی سی مینز ٹی 20ورلڈ کپ کل توں شروع تھیسی، روایتی حریف پاکستان اتے بھارت دی ٹیماں 24 اکتوبر کوں آپت اچ کھیڈسن ۔ پہلے رائونڈ دے میچاں دی میزبانی عمان کریسی۔ ایونٹ دا پہلا میچ میزبان عمان اتے پاپوانیوگنی دی ٹیماں وچال کھیڈیا ویسی۔ عالمی کپ ٹی 20 د افتتاح کوں شاہی رنگ اچ رنگیا ویسی۔ افتتاحی تقریب اچ گھوٹے دی پشت تے ٹرافی پچ تے آندی ویسی۔ آئی سی سی ٹی20 کرکٹ ورلڈ کپ 17 اکتوبر توں 14 نومبر تئیں عان اتے متحدہ عرب امارات اچ کھیڈیا ویسی۔ ورلڈکپ کیتے گروپس دا چݨائو ٹیماں دی درجہ بندی دی بنیاد تے کیتا ڳئے۔ سپر 12 مرحلے دے گروپ ون اچ انگلینڈ، ویسٹ انڈیز، جنوبی افریقہ اتے آسٹریلیا دے نال رائونڈ ون توں کوالیفائی کرݨ آلی ݙو ٹیماں ہوسن جڈانجو ݙوجھے گروپ اچ وی رائونڈ ون توں کوالیفائی کرݨ آلی ٹیماں دے نال پاکستان، نیوزی لینڈ، بھارت اتے افغانستان دی ٹیماں شامل ہوسن۔ ٹی 20 ورلڈ کپ دے میچز دبئی انٹرنیشنل سٹیڈیم، شیخ زید سٹیڈیم، شارجہ کرکٹ سٹیڈیم اتے عمان کرکٹ اکیڈمی گرائونڈ اچ کھیڈیے ویسن۔ میگا ایونٹ دے ابتدائی رائونڈ 17 اکتوبر توں شروع تھیسی۔ پہلے رائونڈ دے گروپ اے اچ سری لنکا، آئرلینڈ، ہالینڈ اتے نمیبیا جڈانجو گروپ بی اچ بنگلہ دیش، سکاٹ لینڈ، پاپوا نیو گنی اتے عمان شامل ہن۔ سپر 12 مرحلہ 23 اکتوبر توں شروع تھیسی۔