مظفرگڑھ۔18اکتوبر (اے پی پی): اچ بھاہ لڳݨ پاروں سڑ تے جاں بحق تھیوݨ آلے7 لوکاں دی نماز جنازہ ادا کرݙتی ڳئی ، نماز جنازہ اچ ڈی پی او حسن اقبال،پولیس افسران اتے شہریاں وݙی تعداد اچ شرکت کیتی ،یاد رہے جو گزریل ݙینھ مظفرگڑھ دے مضافات اچ پیر جہانیاں اچ کمرے دے چھپرے کوں بھاہ لڳݨ پاروں 4 ٻالاں تے 2 تریمتاں سودھے ھکے خاندان دے 7 بندے زندہ سڑ تے جاں بحق تھی ڳئن ،وزیر اعلی پنجاب واقعہ دا نوٹس گھندے ہوئیں کمشنر ڈیرہ غازیخان توں رپورٹ منگ ڳھدی اے ، گھر اچ موجود نہ ہووݨ دی وجہ توں خاندان دے زندہ بچ وںڄݨ آلے واحد فرد محبوب اپݨے سورھیں تے الزام لیندے ہوئیں ݙسائے جو اوں ݙڈھ سال پہلے روہیلانوالی دے علاقے ماہڑہ دی فوزیہ بی بی نال پسند دی شادی کیتی ہئی جیں دا ایندے سورھیں کوں ݙکھ ہئی تے او ایندے توں بدلہ گھنݨ دیاں مسلسل تڑیاں ݙیندے پئے ہن ،اوں الزام لاتے جو سورھیں پسند دی شادی دا بدلہ گھنݨ کیتے گھر کوں بھاہ لاتے اوندے خاندان کوں قتل کیتے ، محبوب دی پولیس کوں تحریری درخواست تے تھاݨہ سول لائنز مظفرگڑھ مدعی مقدمہ دے 2 لوکاں سورھے تے سالے منظور حسین اتے صابر حسین دے خلاف مقدمہ درج کر تے تحقیقات شروع کرݙتی اے، گھر اچ ٻاہ لڳݨ دے نتیجے اچ 4 ٻال جنہاں وچ 2 مہینے دے ٻالڑی وی شامل اے اتے ݙو تریمتان سودھے ھکے خاندان دے 7 بندے 65 سالہ محمد نواز ولد فیض بخش،35 سالہ خورشید مائی زوجہ فاروق،19 سالہ فوزیہ مائی زوجہ کالا خان،12 سالہ شاہنواز ولد فاروق،10 سالہ سرفراز ولد فاروق، ڈھائی سالہ یعقوب ولد فاروق،2 مہینے دی بے بی دختر فاروق زندہ سڑ تے جاں بحق تھی ڳئے ہن ۔
