انٹرنیشنل کرکٹ کونسل ،ٹی 20 ورلڈ کپ دے پہلے رائونڈ اچ منڳل کوں مزید ݙو میچاں دا فیصلہ تھیسی

مسقط۔18اکتوبر (اے پی پی):انٹرنیشنل کرکٹ کونسل (آئی سی سی) دے اہتمام نال مینز ٹی 20 ورلڈ کپ دے پہلے مرحلے اچ منڳل (19اکتوبر) کوں مزید ݙو میچ کھیݙیے ویسن ، الامارات کرکٹ گرائونڈ اچ کھیݙیے ونڄݨ آلے پہلے میچ اچ سکاٹ لینڈ تے پاپوا نیو گنی جݙاں جو ݙوجھے میچ اچ عمان اتے بنگلہ دیش دیاں ٹیماں وچال ٹاکرا تھیسی ۔پہلے رائونڈ دے مقابلے8 ٹیماں دے درمیان کھݙیے ویسن جنہاں اچ عمان، بنگلہ دیش، پاپوا نیوگنی، سکاٹ لینڈ، آئرلینڈ، نمیبیا، سری لنکا اتے ہالینڈ شامل ہن۔ ابتدائی مرحلے دے میچز 22 اکتوبر تئیں جاری رہسن تےہر گروپ اچ سرفہرست ݙو ٹیماں 23 اکتوبرتوں شروع تھیوݨ آلے ٹورنامنٹ دے سپر 12 مرحلے کیتے کوالیفائی کریسن۔ ٹورنامنٹ دا ݙوجھا مرحلہ 23 اکتوبر توں ابوظہی اچ شروع تھیسی جیں اچ پہلا میچ آسٹریلیا اتے جنوبی افریقہ جݙاں جو ݙوجھا میچ انگلینڈ اتے ویسٹ انڈیز وچال کھیڈیا ویسی۔ 24 اکتوبر کوں روایتی حریف پاکستان اتے بھارت دیاں ٹیماں دبئی اچ آمھے سامھے تھیسن ۔ ۔ ٹورنامنٹ دا پہلا سیمی فائنل میچ 10 نومبر کوں ابوظہبی جݙاں جو ݙوجھا سیمی فائنل میچ 11 نومبر کوں دبئی اچ کھیݙیا ویسی ، میگا ایونٹ دا فیصلہ کن معرکہ14 نومبر کوں دبئی انٹرنیشنل کرکٹ سٹیڈیم اچ تھیسی ۔