دبئی۔23اکتوبر (اے پی پی):آئی سی سی ٹی 20 ورلڈکپ اچ روایتی حریف پاکستان اتے بھارت وچال میچ صبحائیں اتوار کوں دبئی انٹرنیشنل کرکٹ سٹیڈیم اچ کھیݙیا ویسی ۔میچ نائٹ ہوسی اتے پاکستانی ویلھے دے مطابق شام ست وڄے شروع تھیسی ۔قومی ٹیم بابراعظم دی قیادت اچ میدان اچ لہسی جݙاں جو بھارتی ٹیم کوں ویرات کوہلی لیڈ کریسن ۔ پوری دنیا دے شائقین کرکٹ دیاں نظراں ایں ہائی وولٹیج میچ تے ہن ۔ سیاسی کشیدگی دی وجہ توں ݙوہیں ملکاں کافی عرصے توں سانجھی سیریز نی کھیݙی ، ایں دوران صرف آئی سی سی ٹورنامنٹس اچ ݙوہیں ٹیماں کوں آپت اچ کھیݙݨ دا موقع ملدے ، ایں ساری صورتحال دے باوجود ݙوہیں پاسوں شائقین کرکٹ اچ جوش تے ولولہ برقرار اے۔ پاکستان اتے بھارت دے درمیان 2007 توں 2016 تئیں 8 ٹی 20 میچ کھیݙیے ڳئن جیں اچ پاکستان ھک تے بھارت چھی میچاں اچ کامیابی حاصل کیتی جݙاں جو ھک میچ ٹائی تھئے ۔
