دبئی ۔25اکتوبر (اے پی پی):آئی سی سی مینز ٹی 20 ورلڈکپ 2021، سپر 12 رائونڈ اچ (کل) منڳل کوں مزید ݙو میچاں دا فیصلہ تھیسی۔ پہلا میچ جنوبی افریقا اتے دفاعی چیمپئن ویسٹ انڈیز دیاں ٹیماں وچال انٹرنیشنل کرکٹ سٹیڈیم ،دبئی اچ کھیݙیا ویسی جݙاں جو ݙوجھے میچ اچ پاکستان اتے نیوزی لینڈ دیاں ٹیماں شارجہ کرکٹ سٹیڈیم اچ آمے سامھیں تھیسن ۔ میچ پاکستانی وقت دے مطابق شام 7 وڄے شروع تھیسی ۔ پاکستان ٹیم آپݨی ورلڈ کپ مہم دا آغاز فاتحانہ اندازاچ کرݙتے ، گرین شرٹس روایتی حریف بھارت کوں آپݨے پہلے میچ اچ 10وکٹاں دی عبرتناک شکست ݙتی اے ۔ پاکستان ٹیم دی قیادت مایہ ناز بلےباز بابر اعظم کریسن جݙاں جو نیوزی لینڈ دی ٹیم کین ولیمسن دی زیر قیادت میدان اچ لہسی ۔ سپر 12 مرحلے اچ ہر ٹیم پنج گروپ اچ میچ کھیݙسی تے ݙوہیں گروپس توں ݙو ٹاپ ٹیماں سیمی فائنل کیتے کوالیفائی کریسن ۔ ٹورنامنٹ دا پہلا سیمی فائنل میچ 10 نومبر کوں ابوظہبی جݙاں جو ݙوجھا سیمی فائنل میچ 11 نومبر کوں دبئی اچ کھیݙیا ویسی۔ میگا ایونٹ دا فیصلہ کن معرکہ14 نومبر کوں دبئی انٹرنیشنل کرکٹ سٹیڈیم اچ تھیسی ۔
