دبئی۔25اکتوبر (اے پی پی):آئی سی سی مینز ٹی 20 ورلڈ کپ کرکٹ ٹورنامنٹ2021اچ پاکستان روایتی حریف بھارت کوں یکطرفہ مقابلے دے بعد 10 وکٹاں توں ہرا ݙتے ۔ شاہیناں بھارت دی طرفوں ݙتا ڳیا 152 رنز دا ہدف 17.5 اوورز اچ بغیر کہیں ضیان دے حاصل کر ڳھدے، محمد رضوان 79اتے کپتان بابراعظم 68 رنز دی ناقابل شکست اننگز کھیݙ تے پاکستان کوں تاریخی کامیابی ݙیوائی ۔ ݙوہیں بلے بازاں بھارت دے خلاف وݙی اوپننگ شراکت دا نواں عالمی ریکارڈ وی بݨائے ۔ گرین شرٹس دی اے ٹی ٹونٹی عالمی مقابلیں اچ بھارت دے خلاف پہلی فتح اے۔ شاہین شاہ آفریدی شروع اچ روہت شرما اتے لوکیش راہول کوں آئوٹ کر تے بھارت دی تکڑی بیٹنگ لائن دی چیل بھن ݙتی ۔ویرات کوہلی دے علاوہ کوئی وی بلے باز پاکستانی بائولرز کوں ڄم تے نہ کھیݙ سڳیا ۔ شاہین آفریدی ترائے کھلاڑیاں کوں آئوٹ کیتا، انہاں کوں مرد میدان قرار ݙتا ڳئے ، گرین شرٹس دی فتح دے نال ہی پاکستان اچ جشن، مداحیں دا دول تے جھمر اتے مٹھائیاں ونڈیاں ڳئن جݙان جو بھارت اچ صف ماتم وچھ ڳئی ۔ اتوار کوں دبئی انٹرنیشنل کرکٹ سٹیڈیم اچ کھیݙیے ڳئے سپر 12 مرحلے دے چوتھے میچ اچ پاکستان دے کپتان بابر اعظم ٹاس جت تے پہلے فیلڈنگ دا فیصلہ کیتا جیڑھا جو درست ثابت تھیا ۔ بھارت دی اننگز دا آغاز مایوس کن ہئی تے ایندی پہلی ݙو وکٹاں 6 دے مجموعی سکور تے ڈھہہ ڳیاں ۔ شاہین شاہ آفریدی پہلے اوور اچ روہت شرما کوں صفر تے ایل بی ڈبلیو کرݙتا جݙاں جو ݙوجھے اوور اچ لوکیش راہول کوں 3 دے انفرادی سکور تے کلین بولڈ کر تے بھارتی بیٹنگ لائن دی چیل بھن ݙتی ، وختی ݙو وکٹاں ڈھݨ دے بعد ویرات کوہلی دا ساتھ ݙیوݨ سوریا کمار یادیو آئے اتے ݙوہیں تیسری وکٹ کیتے 25 رنز جوڑ تے ٹیم دا سکور31 تئیں پڄایا ۔ ایندے توں پہلے اے شراکت خطرناک ثابت تھیندی چھیویں اوور اچ حسن علی سوریا کمار یادیو کوں 11 دے انفرادی سکور تے محمد رضوان دے ہتھوں کیچ آئوٹ کرا ݙتا۔ ویرات کوہلی اتے ریشابھ پنٹ وچال 53 رنز دی شراکت قائم تھئی۔ ریشابھ پنٹ چوتھے آئوٹ تھیوݨ آلے کھلاڑی ہن جیڑھے جو 39 رنز بݨاوݨ دے بعد شاداب خان دا نشانہ بݨ ڳئے ۔ ݙوجھے اینڈ توں کپتان ویرات کوہلی ذمہ واری آلی بیٹنگ دا سلسلہ جاری رکھیندے ہوئیں ادھی سنچری مکمل کیتی، رویندرا جدیجا بھارت دے پنجویں آئوٹ تھیوݨ آلے کھلاڑی ہن جیڑھے جو 13 رنز بݨا تے حسن علی دی گیند تے متبادل کھلاڑی محمد نواز دے ہتھوں کیچ آئوٹ تھی ڳئے ۔ شاہین شاہ آفریدی عمدہ بائولنگ دا سلسلہ جاری رکھیندے ہوئیں ویرات کوہلی دی اننگز دا خاتمہ کرݙتا۔ کوہلی 49 گینداں تے 57 رنز بݨائے ۔ ہارڈیک پانڈیا 11 رنز بݨا تے حارث رئوف دی گیند تے بابر اعظم دے ہتھوں کیچ آئوٹ تھئے۔ ایں طرح بھارت مقررہ 20 اوورز اچ 7 وکٹاں دے ضیان تے 151 رنز بݨائے۔ شاہین شاہ آفریدی ترائے وکٹاں دے نال ساریں توں کامیاب بائولر رہیے۔ حسن علی ݙو جݙاں جو شاداب خان اتے حارث رئوف ھک ھک وکٹ ڳھدی ۔ جواب اچ پاکستان مطلوبہ ہدف کپتان بابر اعظم اتے محمد رضوان دی شاندار بیٹنگ پاروں 17.5 اوورز اچ بغیر کہیں ضیان دے حاصل کر ڳھدا ، ݙوہیں بلے بازاں عمدہ بیٹنگ ݙکھائی تے 152 رنز دی ناقابل شکست شراکت قائم کر تے پاکستان کوں تاریخی فتح ݙیوائی۔ محمد رضوان 55 گینداں تے 79 اتے بابر اعظم 52 گینداں تے 68 رنز دی دلکش اننگز کھیݙی۔ شاہین شاہ آفریدی کوں میچ دا بہترین پلیئر قرار ݙتا ڳیا ۔
