ملتان۔28اکتوبر (اے پی پی):وزیراعلی پنجاب عثمان بزدار دی ہدایت تے سرائیکی دے نامور شاعر شاکر شجاع آبادی دا علاج شروع کرݙتا ڳئے ۔ایں حوالے نال خمیس دے ݙینھ نشتر ہسپتال دے میڈیکل بورڈ انہاں دا تفصیلی معائنہ کیتے۔ وزیراعلی پنجاب دی طرفوں شاکر شجاع آبادی کوں 3 لکھ روپے دا امدادی چیک وی ݙتا ڳئے ۔صوبائی وزیرثقافت خیال احمد کاسترو نشتر ہسپتال اچ امدادی چیک شاکر شجاع آبادی دے حوالے کیتا ایں موقع تے صوبائی وزیر توانائی ڈاکٹر اختر ملک،پارلیمانی سیکرٹری ندیم قریشی اتے ڈپٹی کمشنر عامر کریم خاں وی انہاں دے رلے ہن ۔ایم ایس ڈاکٹر امجد خان چانڈیو بورڈ کوں علاج دیاں سہولتاں بارے بریفنگ ݙتی ، خیال احمد کاسترو آکھیے جو شاکر شجاع آبادی آپݨی شاعری دے ذریعے ایں خطے دی محرومی کوں چاتے اتے انہاں دی ݙیکھ بھال ریاست دی ذمہ واری اے ۔ انہاں آکھیے جو وزیراعلی پنجاب دے حکم تے شاکر شجاع آبادی کوں وختی نشتر ہسپتال منتقل کیتا ڳئے ۔ایں موقع تے صوبائی وزیر توانائی ڈاکٹر اختر ملک آکھیے جو شاکر شجاع آبادی دی شاعری جنوبی پنجاب دی اصل آواز اے اتے انہاں دی ادبی خدمات کوں پنجاب حکومت قدر دی نگاہ نال ݙٰیکھدی اے ۔
