اسلام آباد۔28اکتوبر(اے پی پی)وزیراعظم عمران خان آکھیے جو ملکی بقاء اخلاقی اقدار کوں تکڑا کرݨ نال باقی رہندی اے، اخلاقی اقدار دی بہتری کیتے نبی ﷺ دی سیرت طیبہ رہنمائی دا بہترین رستہ اے۔ اے ڳالھ انہاں اسلام آباد اچ رحمتہ اللعالمین اتھارٹی تے پیشرفت دا جائزہ ڳھنݨ کیتے اجلاس دی اڳواݨی کریندے آکھی۔ اجلاس اچ ݙسایا ڳئے جو اتھارٹی دا آرڈینینس جاری تھی چکیے، 6 ارکان دے بورڈ دی صدارت عمران خان آپ کریسن۔ ارکان اچ مقامی اتے بین الاقوامی سطح دے محققین شامل ہوسن۔ وزیراعظم آکھیا جو ممبران دی تقرری اچ میرٹ دا خاص خیال رکھیا ونڄے، اسلامی خاندانی نظام اتے ایندے معاشرے تے مثبت اثرات تے وی تحقیق ہووݨی چاہیدی اے۔ انہاں آکھیا جو رحمتہ اللعالمین اتھارٹی اخلاقیات دی قومی سطح تے بہتری کیتے اہم اے، ڈرامے، کارٹون اتے فلماں ٻݨایاں ویسن جیندے نال ثقافت اتے تاریخ بارے نوجوان نسل کوں سنڄاݨ ݙتی ویسی، سیرت طیبہ تے ملک اچ وݙا کم تھیندا پئے، اتھارٹی دا مقصد مقامی اتے بین الاقوامی کوششاں کوں ہکی ڄاہ تے کٹھا کرݨ اے۔
