ابوظہبی۔2نومبر(اے پی پی)ٹی 20 ورلڈ کپ دے اہم میچ اچ جنوبی افریقہ ٻہوں سوکھے بنگلہ دیش کوں 6 وکٹاں توں ہرا ݙتے۔ جنوبی افریقہ ٹاس جیت تے پہلے بنگلہ دیش کوں بیٹنگ دا سݙا ݙتے۔ بنگالی ٹیم صرف چراسی رنز ٻݨا تے 19 ویں اوور اچ آئوٹ تھی ڳئی۔ لٹن داس 24 رنز اتے مہدی حسن سب توں ودھ 27 رنز ٻݨائن۔ جنوبی افریقن بالر ربادا اتے اینرچ نورٹیج 3، 3 کھیݙاڑی آئوٹ کیتن۔ تبریز شمسی 2 وکٹاں ڳھدن۔ ولدے اچ جنوبی افریقہ دی ٹیم 85 رنز دا ہدف صرف 4 وکٹاں ونڄا تے پورا کر ڳھدے۔ دوسن 22 رنز، کپتان ٹیمبا باووما 31 رنز ٻݨائن۔ بنگلہ دیشی بالر تسکین احمد 2 وکٹاں ڳھدن۔
