خانیوال۔15دسمبر(اے پی پی) پنجاب دے صوبائی اسمبلی دے حلقہ پی پی 206 خانیوال تے ضمنی انتخابات دا دنگل (اڄ) خمیس 16 دسمبر کوں سڄدا پئے۔ اے نشست پاکستان مسلم لیگ ن دے رکن اسمبلی نشاط احمد خان ݙاہا دی فوتگی توں بعد خالی تھئی ہئی۔ حلقے اچ پاکستان تحریک انصاف ولوں نورین نشاط ݙاہا امیدوار ہین۔ او مسلم لیگ ن دے مرحوم ایم پی اے نشاط احمد ݙاہا دی بیوہ ہین۔ انہاں دے مقابلے اچ مسلم لیگ ن رانا محمد سلیم کون میدان اچ لہائے ڄݙاں جو پاکستان پیپلزپارٹی ولوں سید سراج مقابل ہوسن۔ حلقے اچ 13 امیدوار میدان اچ ہین ڄݙاں جو کل 183 پولنگ سٹیشن قائم کیتے ڳین۔ حلقے اچ رجسٹرݙ ووٹاں دی تعداد 2 لکھ 67 ہزار توں ودھ اے۔ ایں سانڳے پولنگ کیتے سارے انتظامات مکمل کر ڳھدے ڳین۔
