اسلام آباد۔21دسمبر (اے پی پی):صدر مملکت ڈاکٹر عارف علوی آکھیے جو تاجر برادری ملک دی سماجی و اقتصادی ترقی اچ وݙا کردار ادا کریندی پئی اے انہاں دے نال تعاون اتے سہولت کیتے سنجیدہ کوششاں کیتیاں ویندیاں پئن ، نویں ضم شدہ اضلاع (سابق فاٹا) اچ مختلف شعبیں اچ ٻہوں سارے ترقیاتی منصوبے شروع کیتے ڳئن اتے انہاں منصوبیں توں علاقے دے لوکاں کوں ٻہوں فیدہ تھیسی ، صدر مملکت اے ڳال خیبر چیمبر آف کامرس اینڈ انڈسٹری (کے سی سی آئی) دے ھک وفد نال ڳال مہاڑ کریندے ہوئیں آکھی اے جیں منڳل کوں اتھاں ایوان صدر اچ انہاں نال ملاقات کیتی ۔وفد دی قیادت دے سی سی آئی دے صدر سید حسن علی شاہ کریندے پئے ہن ۔ وفد نال ڳال مہاڑ کریندے ہوئیں صدر مملکت آکھیے جو پرامن افغانستان نہ صرف افغانستان بلکہ ایندے ہمسایہ ملکاں کیتے معاشی خوشحالی گھن آوݨ اچ مدد ݙیسی ، انہاں آکھیے جو خیبرپختونخوا دے سرحدی ضلعیں باالخصوص خیبر افغانستان دے نال تجارت اتے تجارتی مواقع توں ٻہوں فیدہ چا سڳدن ۔
