اسلام آباد۔22دسمبر (اے پی پی) پاکستان اتے ایشیائی ترقیاتی بینک توانائی ، سماجی تحفظ، شہری بنیادی ڈھانچہ دی تعمیر،شاہرات اتے آبی وسائل اچ تعاون کیتے ہک ارب، 54 کروڑ 30 لکھ ڈالر دے چھی مالیاتی معاہدیاں تے دستخط کر ݙتن ۔ اقتصادی امور ڈویژن دے سیکرٹری میاں اسد حیاء الدین اتے ایشیائی ترقیاتی بینک دے کنٹری ڈائریکٹر یانگ یی مالیاتی معاونت دے انہاں معاہدیاں تے دستخط کیتن۔ وفاقی وزیر اقتصادی امور عمر ایوب خان وی ایں موقع تے موجود ہن۔ انہاں معاہدیاں اچ پاکستان دے توانائی دے شعبے کوں مضبوط ٻݨاوݨ کیتے مالیاتی، تکنیکی اتے گورننس اصلاحات اچ مدد کیتے ترائے سو ملین امریکی ڈالر دا پالیسی قرضہ شامل اے۔ جیڑھے معاہدیاں تے دستخط کیتے ڳئن انہاں اچ خیبرپختونخواہ دے پںج شہراں اچ شہری بنیادی ڈھانچہ کوں بہتر کرݨ کیتے 385 ملین ڈالر دا فنانسنگ معاہدہ، انڈس ہائی وے دے 222 کلومیٹرطویل شکارپور-راجن پور سیکشن کوں ݙو رویہ ٻݨاوݨ کیتے 235 ملین امریکی ڈالر دا پراجیکٹ لون،احساس پروگرام کوںتقویت اتے ودھاوݨ کیتے 603 ملین امریکی ڈالر دے نتائج تے مبنی قرضہ پروگرام،کرم تنگی انٹیگریٹڈ واٹر ریسورسز ڈویلپمنٹ پراجیکٹ کیتے پنڄ ملین ڈالر دا معاہدہ اتے خیبرپختونخوا سٹیز امپروومنٹ انویسٹمنٹ پروجیکٹ فیز ((II 15ملین امریکی ڈالر دی تیاری کیتے ݙو پراجیکٹ ریڈی نیس فیسیلٹیز دے معاہدے شامل ہن۔ وفاقی وزیر عمر ایوب خان ، ایں موقع تے تعاون کرݨ تے بینک دے صدر، سینئر مینجمنٹ اتے بینک دے بورڈ آف ڈائریکٹرز دا شکریہ ادا کیتا۔
