اقوام متحدہ۔23دسمبر (اے پی پی):اقوام متحدہ اچ پاکستان دے مستقل مندوب منیر اکرم جنگ اتے بین الاقوامی پابندیاں پاروں اقتصادی تباہی تے پڄݨ آلے ملک افغانستان دی انسانی ہمدردی دی بنیاد تے امداد کیتے قرارداد دی منظوری دا خیرمقدم کریندے ہوئیں واضح کیتے جو قرارداد واضح طور تے بین الاقوامی قانونی حیثیت دی تصدیق کریندی اے جو افغان عوام کوں انسانی امداد سلامتی کونسل دی پابندیاں دیاں شقاں دی خلاف ورزی کائنی ۔ انہاں گزریل ݙینھ اقوام متحدہ دی سلامتی کونسل اچ قرارداد پیش کرݨ تے امریکا اتے قرارداد اچ بہتری گھن آوݨ تے چین اتے روس دا شکریہ ادا کیتے۔ انہاں واضح کیتے جو سلامتی کونسل دی قرارداد کوئی ترمیم یا پابندیاں دے نظام توں استثنا کائنی۔ انہاں افسوس دا اظہار کریندے ہوئیں آکھیے جو کونسل دے کجھ اراکین ہݨ وی سیاسی مراعات حاصل کرݨ کیتے افغان عوام دی انسانی اتے اقتصادی مدد دا استعمال کرݨ چاہندن جیڑھا جو افغان قوم دے المناک مشکلات بارے افسوسناک بے حسی اے۔ انہاں آکھیے اساکوں امید اے جو ایں قرارداد دی منظوری توں بین الاقوامی برادری، رکن ریاستاں ، اقوام متحدہ دے ادارے ، فلاحی تنظیماں قانونی رکاوٹاں دی پرواہ کیتے بغیر افغان عوام کوں سارے ممکن امداد ݙیسن ۔
