اسلام آباد۔23دسمبر (اے پی پی):وفاقی سیکرٹری اطلاعات و نشریات شاہیرہ شاہد آکھیے جو پاکستان براڈ کاسٹنگ کارپوریشن دے وقار کوں بحال کرݨ کیتے ساریاں کوششاں جاری ہن ، اے ڳال انہاں اتھاں پاکستان براڈ کاسٹنگ کارپوریشن (پی بی سی) اچ کرسمس دی تقریبات دے سلسلے اچ منعقدہ کیک کٹݨ دی تقریب توں خطاب کریندے ہوئیں آکھی اے ۔ سیکرٹری اطلاعات شاہیرہ شاہد ایں موقع تے مسیحی برادری کوں کرسمس دی مبارخ ݙتی ۔ انہاں ڈائریکٹر جنرل ریڈیو پاکستان محمد عاصم کھچی دی ادارےدی بہتری کیتے کیتی ونڄݨ آلی مخلصانہ کوششاں دی وی تعریف کیتی۔ ایندے توں پہلے ڈائریکٹر جنرل ریڈیو پاکستان آکھیے جو اسلام امن دا مذہب اے اتے بین المذاہب ہم آہنگی اتے ساریں کیتے مذہبی روایات دی آزادی دا درس ݙیندے ۔ انہاں پاکستانی مسیحی برادری کوں ملک دی ترقی کیتے شاندار خدمات انجام ݙیوݨ تے خراج تحسین پیش کیتے۔
