اسلام آباد۔27دسمبر(اے پی پی)قومی سلامتی کمیٹی پاکستان دی پہلی قومی سلامتی پالیسی دی منظوری ݙے ݙتی اے۔ وزیراعظم عمران خان قومی سلامتی کمیٹی دے اجلاس اچ ملک دی پہلی قومی سلامتی پالیسی دے منظور تھیوݨ کوں وݙا تاریخی قرار ݙیندے آکھیے جو پاکستان کہیں وی داخلی اتے خارجی خطرات نال نبڑݨ دی پوری صلاحیت رکھدے، قومی سلامتی پالیسی تے مؤثر عملدرآمد کیتے مربوط حکمت عملی اپنائی ویسی۔ اے ڳالھ انہاں اپݨے زیر صدارت اسلام آباد اچ تھیوݨ آلے قومی سلامتی کمیٹی اجلاس اچ آکھی۔ اجلاس اچ وزیر خارجہ، وزیر دفاع، وفاقی وزیر اطلاعات و نشریات، داخلہ، خزانہ، انسانی حقوق دے وفاقی وزرا، چیئرمین جوائنٹ چیفس آف سٹاف کمیٹی، تریے مسلح افواج دے سربراہان، قومی سلامتی مشیر اتے سینئر سول و عسکری حکام شرکت کیتی۔ وزیراعظم عمران خان آکھیے جو ملک دا تحفظ شہریاں دے تحفظ نال ڄڑیا ہوئے، قومی سلامتی پالیسی دی تیاری اتے منظوری تے قومی سلامتی ڈویژن اتے متعلقہ اداریاں دیاں کوششاں قابل تحسین ہین۔ متعلقہ ادارے اتے قومی سلامتی مشیر پالیسی تے عملدرآمد کیتے ماہانہ رپورٹ پیش کرݨ دی وی ہدایت کیتی۔ قومی سلامتی مشیر اجلاس اچ پالیسی دے خدوخال تے بریفنگ ݙتی۔
