کراچی۔1جنوری(اے پی پی)ترجمان وزارت خزانہ مزمل اسلم آکھیے جو نومبر توں دسمبر تئیں ملک اچ مہانڳ نئیں ودھیا اتے کھاوݨ پیوݨ دیاں شئیں دا ملھ ڳھٹݨ لڳ ڳئے۔ کراچی اچ میڈیا نال الیندے انہاں آکھیا جو مالی سال2021ء اچ شرح نمو 4 فیصد رہی، رواں سال آئی ٹی سیکٹر اچ 4 ارب ڈالر ایکسپورٹ تھی ویسی، ایں ویلھے اٹا، ککڑ دے گوشت، انڈے دا ملھ مستحکم اے۔ انہاں آکھیا جو آئی ایم ایف پروگرام تے شور تھئے جو وݙا مہانڳ تھیسی، آئی ایم ایف 700 ارب ٹیکس لاوݨ دا آکھیے بھل اساں 350 ارب روپے دے ٹیکسز ودھائن، منی بجت اوں ویلھے آندے ڄݙاں ٹیکس اہداف پورے نہ تھیون، 6 مہینے اچ اساں ٹیکس ہدف توں ودھ کٹھا کیتے اتے عام لوکاں تے نواں ٹیکس نئیں لایا صرف امپورٹڈ اشیا تے ٹیکس لگے، کھیر، ݙہی، چھوٹی بیکریاں تے ٹیکس نئیں لگیا۔ ترجمان آکھیا جو آوندے ݙینھاں اچ تیل دیاں قیمتاں ڳھٹ ویسن، حالی ساکوں عالمی منݙی نال مسابقت رکھݨی پوندی پئی اے۔
