اسلام آباد۔3جنوری (اے پی پی):پاکستان کرکٹ ٹیم دے سابق کپتان اتے مایہ ناز آل راؤنڈر محمد حفیظ انٹرنیشنل کرکٹ توں ریٹائرمنٹ گھنݨ دا اعلان کرݙتے۔18 سال تے مشتمل انہاں دے انٹرنیشنل کرکٹ کیرئیر دا آغاز 3 اپریل 2003 کوں زمبابوے دے خلاف میچ توں تھیا ، انہاں چھیکڑی واری 11 نومبر 2021 کوں آئی سی سی مینز ٹی 20 ورلڈ کپ دے سیمی فائنل اچ آسٹریلیا دے خلاف پاکستان دی نمائندگی کیتی ہئی ۔ ایں دوران انہاں 392 انٹرنیشنل میچز اچ 12780 رنز سکور کرݨ دے نال نال 253 وکٹاں وی حاصل کیتیاں ۔انہاں 32 انٹرنیشنل میچز اچ پاکستان دی قیادت کیتی۔ اوآئی سی سی چیمپئنز ٹرافی 2017 دی فاتح قومی ٹیم دا حصہ ہن. انہاں پنجاہ اوورزتے مشتمل 3 اتے ٹی 20 فارمیٹ تے مشتمل 6 ورلڈ کپ اچ پاکستان دی نمائندگی کیتی۔ ایں دوران انہاں 3 آئی سی سی چیمپئنز ٹرافی اچ وی حصہ ڳھدا ۔ محمد حفیظ آکھیے جو او اڄ فخر نال انٹرنیشنل کرکٹ توں ریٹائرمنٹ دا اعلان کریندن ۔
