اسلام آباد۔6جنوری (اے پی پی):وزیر مملکت اطلاعات و نشریات فرخ حبیب آکھیے جو رانا ثناء اللہ ݙساون 3کروڑ روپے ن لیگ کوں ݙیوݨ آلے بھون داس کون ہن ؟ عوام 2018دے الیکشن اچ اساکوں مینڈیٹ ݙتے آپݨی مدت پوری کریسوں ،ن لیگ کنے ٻہوں سارے ہیرے ہن، کوئی ایفی ڈرین سمگل کریندے تاں کوئی منشیات سمگلنگ اچ رنگے ہتھوں وٹھیا ویندے ، خمیس کوں لیگی راہنماء رانا ثناء اللہ دی پریس کانفرنس تے آپݨے ردعمل اچ وزیر مملکت اطلاعات و نشریات فرخ حبیب آکھیے جو پی ٹی آئی واحد جماعت اے جیں الیکشن کمیشن کوں 40ہزار ڈونرز دا مکمل ریکارڈ ݙتے ،ن لیگی آلہ کار اکبر ایس بابر دے فارن فنڈنگ کیس کوں سکروٹنی کمیٹی ردی دی ٹوکری وچ پاݙتے ،ن لیگ اچ ݙو گروپس کھل تے سامݨے آچکن، ھک ݙینھ شہباز شریف اتے ݙوجھے ݙینھ مریم گروپ میڈیا تے آتے آپݨا رووݨ روندے ،انہاں لوکان دے منہ توں اداریں دی حدود دی ڳالھ زیب نی ݙیندی جیڑھے جو اداریں تے حملے کریندے رہ ڳئن ، انہاں آکھیے جو ن لیگ دے پارٹی اکائونٹس اچ مشتبہ ٹرانزیکشنز ثابت تھی چکن ،ن لیگ کنے 62کروڑ دا کوئی حساب کائنی ،ن لیگ دے 9 خفیہ بینک اکائونٹس سامݨے آچکن ، پی ٹی آئی او پہلی سیاسی جماعت اے جیں پولٹیکل فنڈریزنگ دی روایت متعارف کرائی اے۔
