اسلام آباد۔12جنوری (اے پی پی):وفاقی وزیر سائنس اینڈ ٹیکنالوجی سینیٹر شبلی فرازآکھیے جو حکومت انتخابی عمل اچ اہم حصہ دار بݨاوݨ کیتے ٻاہرے ملک رہݨ آلے پاکستانیاں کوں ای ووٹنگ دا حق ݙتے، اساکوں توقع اے جو سمندر پار پاکستانی ملک دی تعمیر و ترقی اچ آپݨا کردار ادا کریندے رہ ویسن ، حکومت ٻاہرلے ملک رہݨ آلے پاکستانیاں کوں پیش آندی اوکھ دے ازالے کیتے آپݨا کردار ادا کریسی۔ او ٻدھ کوں اوور سیز گلوبل فائونڈیشن دے زیر اہتمام انٹرنیشنل کنونشن توں خطاب کریندے پئے ہن ، انہاں آکھیے جو سمندر پار پاکستانی ہمیشہ اساݙے کیتے اہم رہین ، وزیراعظم عمران خان وی ھک ویلھے اچ سمندر پار پاکستانی ہن ، ایں تجربے توں میں وی گزر چکیاں ۔ انہاں آکھیے جو سمندر پار پاکستانی کہیں وی ملک اچ ہوون انہاں دی پاکستان نال محبت کئی گنا ودھ ویندی اے کیوں جو دوری اچ احساس محرومی کئی ڳنا ودھ ویندے ۔ انہاں آکھیے جو دنیا اچ کہیں وی جاہ تے اے لوک کوئی چنڳی چیز ݙیکھدن تاں انہاں دی اے خواہش ہوندی اے جو اے چیز پاکستان اچ وی ہووݨی چاہیدے اے ،وزیراعظم کابینہ دے ہر اجلاس اچ سمندر پار پاکستانیاں دے حقوق دی بھرپور سپورٹ کریندن کیوں جو انہاں کوں انہاں دے مسئلیں دا بہتر پتہ اے ، انہاں آکھیے جو بدقسمتی توں پاکستانیاں کوں قبضہ گروپ جیہے مسئلیں دا وی سامݨا اے ، انہاں آکھیے جو اساݙی معیشت دا زیادہ انحصار انہاں پاکستانیاں دی ترسیلات زر تے ہے۔
