اسلام آباد۔11جنوری (اے پی پی):صدر مملکت ڈاکٹر عارف علوی وفاقی محتسب دا نیشنل بینک آف پاکستان کوں فراڈ توں متاثرہ شخص کوں رقم واپس کرݨ دا حکم برقراررکھیندے ہوئیں ہدایت کیتی اے جو نیشنل بینک فراڈ توں متاثرہ شہری کوں 5 لکھ روپے دی رقم لازماً واپس کرے۔ ایوان صدر دے پریس ونگ توں ٻدھ کوں جاری بیان موجب صدر مملکت آکھیے جو افسوس اے جو بینک اپݨے ہی منیجر دے ہتھوں فراڈ دا نشانہ بݨݨ آلے صارفین کوں انصاف نی ݙیندا پیا ۔ فیصل آباد دے شہری محمد عبدالرشید بینک اکاؤنٹ کھلویندے ویلھے 5 لکھ روپے بینک منیجر کوں جمع کرائے۔ سابقہ برانچ منیجر اختر حسین دستخط اتے مہرشدہ رسید شہری کوں ݙتی مگر رقم اکاؤنٹ اچ جمع نہیں کرائی جݙاں جو 56 شہریاں نال فراڈ دے ذریعے 9 کروڑ 80 لکھ روپے دی رقم کھس ڳھدی ڳئی ۔ شہری بینک توں رقم واپسی کیتے رجوع کیتا مگر کوئی ریلیف نہ مل سڳیا جیں تے شہری انصاف گھنݨ کیتے بینکنگ محتسب کوں درخواست ݙتی جیں رقم واپسی دا حکم ݙتا۔ نیشنل بینک رقم واپس کرݨ دے حکم دے خلاف صدر مملکت کوں اپیل دائر کیتی ہئی ۔ صدر ڈاکٹر عادف علوی آکھیے جو بینک منیجر دی دستخط اتے مہر شدہ رسید درست اے اتے بینک ایندی پابندی دا مجاز اے، شکایت کنندہ درست رسیداں تے بینک احاطے اچ حاضر سروس بینک مینیجر کوں رقم جمع کروائی، بینک منیجر دے اقدام بے ضابطگی اتے بد انتظامی دے زمرے اچ آندن ۔
