علاقائی و عالمی سطح تے پاکستان اتے روس ھکی سوچ دے نال اڳوں ودھدے پئن ،افغانستان دے مسئلے تے ساݙی نیڑے مشاورت رہی اے، وزیر خارجہ مخدوم شاہ محمود قریشی

اسلام آباد۔18جنوری (اے پی پی):وزیر خارجہ مخدوم شاہ محمود قریشی آکھیے جوعلاقائی و عالمی سطح تے پاکستان اتے روس ھکو جہی سوچ دے نال اڳوں ودھدے پئن ،افغانستان دے مسئلے تے اساݙی نیڑے مشاورت رہی اے ۔ منڳل کوں آپݨے ھک بیان اچ انہاں آکھیے جو پاکستان تے روس دے تعلقات مسلسل بہتری دے پاسے ٹردے پئن ،پاکستان ماسکو فارمیٹ دا حصہ رہ ڳئے ۔اساݙی نارتھ ساؤتھ گیس پائپ لائن دے حوالے نال انڈرسٹنڈنگ پیدا تھیندی پئی اے جیڑھے جو اساݙے درمیان اقتصادی و توانائی دے شعبے اچ تعاون ودھاوݨ دے حوالے نال انتہائی اہم قدم اے۔ شاہ محمود قریشی آکھیے جو ہݨے ہی روسی صدر پیوٹن دی طرفوں اسلاموفوبیا دے حوالے نال جیڑھا بیان منظر عام تے آئے ایندے اچ اوہو موقف اپنایا ڳئے جیڑھا جو وزیر اعظم عمران خان اتے پاکستان دا اے، ایں توں ظاہر تھیندے جو علاقائی و عالمی سطح تے پاکستان اتے روس ھکو جیہی سوچ دے نال اڳوں ودھدے پئن افغانستان دے حوالے نال انہاں آکھیے جو پاکستان دیاں کوششاں توں دنیا افغانستان دی صورتحال دے پاسے متوجہ تھئی اے ، تاں جو ہݨ مزید توجہ درکار اے۔افغانستان اچ سردی اچ ودھارے پاروں صورتحال مزید خراب تھیندی ݙکھالی ݙیندی پئی اے پاکستان ، افغانستان دے مسئلے تے، عالمی سطح تے اتفاق رائے پیدا کرݨ دی کوشش کیتی اے سلامتی کونسل دی طرفوں ھک قرارداد وی سامݨے آئی اے جیں اچ افغانستان اچ انسانی معاونت دی فراہمی دے حوالے نال پابندیاں اچ نرمی کیتی ڳئی اے ۔مزید بہتری دے آثار پیدا تھیسن ،جنوبی پنجاب صوبے دے حوالےنال شاہ محمود قریشی آکھیے جو جنوبی پنجاب کوں انڄ شکل ݙیوݨ ، وزیر اعظم عمران خان دا جنوبی پنجاب دی عوام دے نال وعدہ اے،جنوبی پنجاب صوبے دا قیام ساݙے منشور دا حصہ اے جیں تے اساں عمل کریندے پیوں ۔اساں رولز آف بزنس اچ ترامیم کرتے اختیارات کوں منتقل کیتے ۔انہاں آکھیے اساں ملتان اتے بہاولپور اچ سیکریٹیریٹ قائم کر تے افسران تعینات کر ݙتن ،تاں جو جنوبی پنجاب دے واسیاں دے مسئلے مقامی سطح تے حل تھی سڳن ۔ملتان اچ جنوبی پنجاب سیکریٹیریٹ دا نہ صرف سنگ بنیاد رکھیا ڳئے بلکہ اتھاں عملی طور تے کم وی شروع تھی ڳئے ایں سال اساں جنوبی پنجاب کیتے انڄ سالانہ ترقیاتی پروگرام ݙتے ۔پہلے دور اچ جنوبی پنجاب کیتے فنڈز مختص کیتے ویندے ہن لیکن ایں سال دوران انہاں کوں ݙوجھے علاقیں اچ منتقل کرݙتا ویندا ہئی ہݨ اینویں کائناں تھیسی ۔شاہ محمود قریشی آکھیے جو میں کل سینیٹ دے فلور تے وی آکھیے جو جنوبی پنجاب دے حوالے نال پاکستان تحریک انصاف دیاں کوششاں کوں عملی جامہ پواوݨ کیتے ݙو تہائی اکثریت درکار اے،جے پاکستان پیپلز پارٹی ایں حوالے نال سنجیدہ اے تاں اساں رل تے ڳال کرݨ کیتے تیار ہیسے ۔نون لیگ توں وی میݙی ایہا گذارش ہو سی جو جنوبی پنجاب صوبے دے حوالے نال سنجیدگی دا مظاہرہ کرے۔انہاں آکھیے جے ترائے وݙیاں جماعتاں، جنوبی پنجاب دے حوالے نال سنجیدگی دا مظاہرہ کریندن تاں خیبر پختون خوا اتے بلوچستان توں وی ٻہوں ساریاں جماعتاں ایجھیاں ہن جیڑھیاں ایں ٻل دی حمایت کیتے تیار تھی ویسن تے ایں طرح جنوبی پنجاب صوبہ ھک حقیقت دا روپ دھار سڳدے ۔