محمد رضوان آئی سی سی مینز ٹی ٹونٹی کرکٹر آف دی ایئر 2021 قرار

xاسلام آباد۔23جنوری(اے پی پی)سٹار پاکستانی وکٹ کیپر بیٹسمین محمد رضوان کوں چنڳی کارکردگی دا پھل مل ڳئے اتے انہاں آئی سی سی مینز ٹی ٹونٹی کرکٹر آف دی ایئر 2021ء دا ایوارڈ اپݨے ناویں کر ڳھدے۔ انگلش بیٹر ٹامی بیومونٹ ویمنز ٹی ٹونٹی آف دی ایئر ایوارڈ ڳھدے۔ آئی سی سی سال 2021ء اچ چنڳی کارکردگی ݙکھاوݨ آلے مردوخواتین کھلاڑیاں کیتے ایوارڈز دا اعلان کیتے۔ محمد رضوان سال 2021ء اچ 29 ٹی ٹونٹی میچز اچ 73.66 دی اوسط نال 1326 رنز ٻݨائن اتے وکٹاں دے پیچھو 22 شکار وی کیتن۔ او پچھلے سال ٹی ٹونٹی ورلڈکپ اچ ودھ رنز ٻݨاوݨ آلے بلے بازاں اچ تریڄھے نمبر تے رہین۔ رضوان کیلنڈر ایئر اچ ہزار ٹی ٹونٹی انٹرنیشنل اتے کل ٹی ٹونٹی میچز اچ 2 ہزار رنز ٻݨآوݨ آلے ڄڳ دے پہلے بیٹر ہین۔ ٻئے پاسو پاکستان دی فاطمہ ثنا آئی سی سی ویمنز ایمرجنگ کرکٹر آف دی ایئر ایوارڈ ڳھدے۔ انہاں سال 2021ء اچ 16 ٹی ٹونٹی میچز اچ 165 رنز ٻݨائن اتے 24 وکٹاں ڳھدن۔