ہر ڄاہ تے ن لیگ دی جعل سازی ثابت تھئی اے، تحریک انصاف اڄ وی مقبول ترین سیاسی جماعت اے، شاہ محمود قریشی

ملتان۔23جنوری(اے پی پی)وزیر خارجہ مخدوم شاہ محمود قریشی آکھیے جو ہر ڄاہ تے ن لیگ دی جعل سازی ثابت تھئی اے، تحریک انصاف اڄ وی مقبول ترین سیاسی جماعت اے، ن لیگ 20 ارب ڈالر دا خسارہ ورثہ ترکے اچ سٹ ڳئی ہئی، مہانگی بجلی دے معاہدے نواز شریف کیتے ہن جیندی چٹی قوم بھگتدی پئی اے، حکومت اوکھے فیصلے کیتن اتے ملک کوں ݙیوالہ تھیوݨ تؤں بچائے، اے سمڄھݨا ہوسی جو مہانڳ کیندا کارنامہ اے؟ ن لیگی قیادت آوے اتے مذاکرہ کرے، پلوامہ ڈرامہ کرتے پاکستان تے حملہ تھیندے، نریندر مودی کوں جاتی عمرہ اچ ساڑھیاں دا تحفہ اساں ݙتا ہا؟ اساں تاں ابھی نندن کوں چاہ پلا تے ٻھیڄیے، بھارت دیان اکھیں اچ اکھیں پا تے الائے، جموں و کشمیر اچ مظلوم کشمیریاں تے جاری بھارتی مظالم و جارحیت تے ڄڳ دا ستا ضمیر جڳائے، اقوام متحدہ اچ وزیراعظم عمران خان اتے تہاݙے منتخب نمائندے گستاخ رسول دے خلاف علم چاتے، اسلامو فوبیا تے الائے، افغاناں دی ٻکھ کریہہ دی ڳڳالھ کیتی اے، 57 ممالک دے وزراءخارجہ اتے وفود سݙین، اینڄھے اقدامات پہلے کہیں حکومت کیتن؟ اے ڳالھ انہاں ملتان اچ این اے 156 دی یونین کونسل 17 اچ استقبالیہ نال خطاب اچ آکھی۔ صوبائی معاون خصوصی حاجی جاوید اختر انصاری وی انہاں دے نال ہن۔ انہاں آکھیا جو اپوزیشن دیاں قطاراں ترٹ ڳین، اسلام آباد ہائی کورٹ رانا شمیم دا بیان حلفی اتے آڈیو ٹیپ وی قطری خط آلی کار جعلی قرار ݙتی اے، عدلیہ اتے اداریاں تے حملہ ن لیگ دا کھیݙ اے بھل عوام انہاں ݙوہائیں ڄماعتاں دا اصل سنڄاݨ چکین اتے وزیراعظم عمران خان ہی عوام دی امید دی چھیکڑی لاٹ ہین، پی ٹی آئی جنوبی پنجاب صوبے دے منشور تے پکی اے، ایں سانڳے پارلیمنٹ اچ بل پیش کریسوں۔