اسلام آباد۔2فروری (اے پی پی):وزیر خارجہ مخدوم شاہ محمود قریشی دی صدارت اچ بدھ کوں وزارت خارجہ اچ سینٹرل کوآرڈینیشن کمیٹی قونصلر سروسز دا اجلاس منعقد تھیا ۔اجلاس اچ وفاقی سیکرٹری اسٹیبلشمنٹ ، وفاقی سیکرٹری وزارت قانون و انصاف، چیئرمین نادرا تے ٻیاں وزارتاں دے سینیئر افسران شریک تھئے جݙاں جو چیف سیکرٹری پنجاب، ہوم سیکرٹری خیبر پختون خواہ بذریعہ ویڈیو لنک اجلاس اچ شرکت کیتی۔وزیر خارجہ سینٹرل کوآرڈینیشن کمیٹی دے اجلاس دے شرکاء کوں آکھیے جو وزیر اعظم عمران خان، ٻاہرلے ملک رہݨ آلے پاکستانیاں دی فلاح و بہبود اچ خصوصی دلچسپی رکھیندن ۔وزیر اعظم عمران خان دے وژن دی روشنی اچ اساں قونصلر سروسز دے حوالے ںال ٻہوں ساریاں مثبت تبدیلیاں متعارف کروائن ،ایں حوالے نال وزیر اعظم عمران خان دی زیرصدارت ھک اہم اجلاس منعقد تھیا ۔ شاہ محمود قریشی آکھیے جو اساݙے ٻہوں سارے سفیراں ایں اجلاس اچ ورچوئل شرکت کیتی تے ٻاہرلے ملک رہݨ آلے پاکستانیاں کوں ݙتی ونڄݨ آلی قونصلر خدمات دی تفصیل بارے ݙسایا ، انہاں آکھیے جو وزیر اعظم عمران خان صاحب دی خصوصی ہدایت تے سنٹرل کوآرڈینیشن کمیٹی قونصلر سروسز تشکیل ݙتی ڳئی جیں دا اڄ پہلا اجلاس تھیندا پئے ۔قونصلر سروسز اچ مشین ریڈایبل پاسپورٹ دا اجراء،قومی شناختی کارڈ دی تجدید، ویزا سروسز، شہریت دی تصدیق، ایمرجنسی سفری دستاویزات دا اجراء سودھے ٻہوں ساری خدمات شامل ہن جیرھی جو پوری دنیا اچ اساݙے سفارتخانے، ٻاہرلے ملک رہݨ آلے پاکستانیاں کوں ݙیندے پئن ۔وزیر خارجہ آکھیے جو قونصلر سروسز دی بہتر فراہمی کیتے ساریاں متعلقہ وزارتاں دے مابین نیڑے رابطہ ٻہوں اہمیت رکھیندے میݙی ہدایت تے سارے سفیراں ٻاہرلے ملک رہݨ آلے پاکستانیاں کوں پیش آندی مشکلات دے وختی ازالے کیتے باقاعدگی نال “ای کچہریاں” منعقد کریندے پئن ٻاہرلے ملک رہݨ آلے پاکستانیاں کوں سہولت ݙیوݨ کیتے ، پاور آف اٹارنیز دی تصدیق کوں آن لائن بݨایا ڳئے ۔چیئرمین نادرا طارق ملک وزیر خارجہ کوں نادرا دی طرفوں پاکستانی سفارتخانیں اچ نویں کھولیے ڳئے نادرا کاؤنٹرز تے پیش کیتی ڳئی خدمات دی تفصیلات بارے ݙسایا ۔
