اسلام آباد۔2فروری (اے پی پی):سپریم کورٹ آف پاکستان دے سینئر ترین جج جسٹس عمر عطا بندیال 28 ویں چیف جسٹس آف پاکستان دے طور تے آپݨے عہدے دا حلف چا ڳھدے ۔ ٻدھ کوں ایوان صدراچ منعقدہ ھک پروقار تقریب اچ صدر مملکت ڈاکٹر عارف علوی انہاں توں حلف ڳھدے ۔ تقریب اچ وزیراعظم عمران خان خصوصی طورتے شرکت کیتی ۔ جݙاں جو تقریب دے ٻئے شرکاء اچ سپیکر قومی اسمبلی اسد قیصر، ڈپٹی سپیکر قاسم خان سوری، وفاقی وزیر اطلاعات و نشریات چوہدری فواد حسین ،وزیرخارجہ مخدوم شاہ محمود قریشی، وفاقی وزیر قانون و انصاف بیرسٹر ڈاکٹرنسیم فروغ سودھے ٻئے وفاقی وزرا ، وزرائے مملکت ، ارکان پارلیمنٹ، ججز صاحبان، وکلا تنظیماں دے عہدیداراں تے سول وفوجی حکام شامل ہن۔ایں موقع تے جسٹس عمر عطا بندیال دی بطور چیف جسٹس تعیناتی دانوٹیفکیشن وی پڑھ تے سݨایا ڳیا ۔ صدر مملکت ڈاکٹر عارف علوی سپریم کورٹ دے سینئر ترین جج جسٹس عمر عطا بندیال کوں چیف جسٹس آف پاکستان مقررکیتا۔انہاں دی تعیناتی دا نوٹیفکیشن 2 فروری توں نافذ العمل اے۔ انہاں دے پیشرو چیف جسٹس آف پاکستان جسٹس گلزار حسین یکم فروری کوں آپݨی مدت ملازمت پوری تھیوݨ دے بعد سبکدوش تھی ڳئے ہن ۔
