اسلام آباد ۔2فروری (اے پی پی):وفاقی وزیر داخلہ شیخ رشید احمد آکھیے جو اپوزیشن دے تلیں اچ تیل کائنی ،وزارت داخلہ ھک سال اچ نادرا دے 87نویں سنٹرز کھولیے، سعودی وزیر داخلہ پرنس عبدالعزیز بن سعود بن نائف وزارت داخلہ دی دعوت تے پاکستان دا دورہ کریسن ،سعودی عرب دے نال ساݙے رشتے ہمالیہ توں وی اچے ہن ، سعودی عرب اتے پاکستان یکجان ݙو قالب ہن ، سعودی وزیر داخلہ وزیراعظم پاکستان اتے صدر مملکت ںال وی ملاقات کریسن ،وزیراعظم عمران خان 3فروری کوں چین دا تاریخی دورہ کریسن، موجودہ عالمی صورتحال دے حوالے نال سی پیک تے ٻئے معاملات زیر غور آسن ، پنج فروری کوں یوم یکجہتی کشمیربھرپور طریقے ںال منایا ویسی ، اے ڳال انہاں ٻدھ کوں اسلام آباد اچ وزارت داخلہ میڈیا سنٹر اچ اہم پریس کانفرنس توں خطاب کریندے ہوئیں آکھی اے ، انہاں آکھیے جو لال حویلی اچ وی یوم یکجہتی کشمیر دی تقریب تھیسی ،شرکاء توں گذارش اے جو ماسک پا تے آون ، نوزشریف ھک بدنصیب انسان اے ، جیڑھا نقلی رپورٹس دے ٻل تے بھڄ ڳئے ،دنیا اچ ایجھا کوئی لیڈر کائنی جیڑھا آپݨے ملک توں بڄھے ،خود کورونا دی وجہ توں نی آندے پئے تے لوکاں کوں آکھدن جو کورونا اچ جلوس کڈھو ،لوکاں کوں بیماری اچ پاوݨ چاہندن تے خود انہاں کوں آپݨی صحت اتنی عزیز اے ،عمران خان آکھیا ہئی جو ترائے مہینے اہم ہن ھک مہینہ گزر ڳئے ،سٹھ ݙینھ ٻئے ہن ،اپوزیشن وݙے شوق نال اسلام آباد آوے ،اپوزیشن دے تلیں وچ تیل کائنی ۔وفاقی وزیر داخلہ آکھیے جو اپوزیشن دے رنگ پسٹن ٻہہ ڳئن ، انہاں دے پلگ وچ کچرا پھتا ہویا اے ، 27فروری اتے 23مارچ کوں وی شوق پورا کرگھنن تے زیادہ شوق مولانا فضل ا لرحمن کوں اے ،عمران خان او واحد بندہ اے جیڑھا اڄ وی افغانستان اچ تھیوݨ آلے انسانیت دے مسئلے تے آواز چیندا کھڑے ۔شیخ رشید آکھیے جو وزارت داخلہ ھک سال اچ نادرا دے 87نویں سنٹرز کھولیے ، سندھ اچ 23،پنجاب اچ 11، کے پی کے اچ 16،بلوچستان اچ 13،آزاد کشمیر اچ وی 13اتے گلگت بلتستان اچ 10جݙاں جو اسلام آباد اچ ھک سنٹر شامل ہن ۔وفاقی وزیر داخلہ ݙسایا جو ٻاہرلے ملک 13نویں سنٹرز اڄوکے سال قائم کیتے ویسن، سندھ اچ13پاسپورٹ سنٹر بݨاوݨ چاہندوں ایں ضمن اچ سندھ اچ 13 جہیں دی نشاندہی وی کیتی ڳئی اے ،تاخیر سندھ حکومت دی طرفوں آندی پئی اے ۔
