اسلام آباد۔2فروری (اے پی پی) وزیر اعظم عمران خان متحدہ عرب امارات تے حوثیاں دے میزائل حملے دی مذمت کریندیں ہوئیں اینکوں خطے دے امن تے سلامتی کیتے خطرہ قرار ݙتے۔ بدھ کوں وزیر اعظم ، ابوظہبی دے ولی عہد اتے متحدہ عرب امارات دی مسلح افواج دے سپریم کمانڈر شیخ محمد بن زید النیہان نال ٹیلی فون تے ڳالھ کیتی اتے حوثی باغیاں ولوں 30 جنوری کوں تھیوݨ آلے میزائل حملے دی مذمت کیتی۔ انہاں متحدہ عرب امارات ولوں ویلھے تے اتے موثر فضائی دفاع نال قیمتی جاناں دے ضیان توں بچݨ دے اقدام دی تعریف کیتی۔ وزیر اعظم ، متحدہ عرب امارات دی قیادت،عوام اتے حکومت نال یکجہتی دا اظہار کیتا۔ ݙوہیں رہنماواں آپسی تعاون اتے آپسی دلچسپی دے معاملیاں تے ڳالھ مہاڑ کیتی اتے اعلیٰ سطح تے قریبی اتے باقاعدہ مشاورت جاری رکھݨ تے اتفاق کیتا۔
