
اسلام آباد۔2فروری(اے پی پی)وزیر اعظم عمران خان آکھیے جو حکومت سرمایہ کاری، کاروبار ودھاوݨ کیتے تاریخی اقدامات کیتن، صنعتکار و تاجر برادری عام آدمی کوں سوکھ ݙیوݨ کیتے حکومت دا ہتھ ونݙاون، پاکستان تحریک انصاف دے منشور موجب آئی ٹی اتے ٹیکسٹائل دی برآمدات دی پالیسی دے ثمرات ہݨ واضح تھیندے ویندن۔ اے ڳالھ انہاں معروف صنعتکاراں اتے تاجراں دے وفد نال ملݨ ویلھے آکھی۔ وزیر اعظم آکھیا جو کاروبار دوست پالیسیاں پاروں ملک دی 10 وݙیاں کمپنیاں پچھلے سال 929 ارب روپے منافع کمائے، حکومت سرمایہ کاری اتے کاروبار دے ودھارے کیتے تاریخی اقدامات کیتن جیڑھے پہلے کہیں حکومت نئیں کیتے، آئی ٹی، ٹیکسٹائل، دفاعی پیداوار اتے انجینئرنگ دے شعباں تے توجہ ݙتی ونڄے۔ صنعتکاراں برآمدات ودھاوݨ، چھوٹی و درمیانی صنعتاں دے فروغ، ٹیکس نظام اچ بہتری اتے دورہ چین بارے تجاویز ݙتن۔ ملاقات اچ صنعتکار ثاقب شیرازی (ہونڈا اٹلس), علی اصغر جمالی (انڈس موٹرز), غیاث الدین خان (اینگرو), سکندر مصطفٰی (ملت ٹریکٹر)، حامد زمان (سیفام) شاہد عبداللہ (سیفائر), خرم مختار (پاکستان ٹیکسٹائل ایکسپورٹرز ایسوسی ایشن)، زاہد بشیر (گل احمد)، اعظم فاروق (چراٹ سیمنٹ), خلیل ستار (کے اینڈ انز)، عبد الرحیم اتے گوہر اعجاز(اپٹما) موجود ہن۔ وفاقی وزراء شوکت ترین، اسد عمر، حماد اظہر، مخدوم خسرو بختیار، چوہدری فواد حسین، مشیر تجارت عبدالرزاق دائود، آرمی چیف جنرل قمر جاوید باجوہ سودھا وزیر مملکت فرخ حبیب، معاون خصوصی ڈاکٹر شہباز گل اتے سینئر افسران وی موجود ہن۔