اسلام آباد۔7فروری (اے پی پی):گورنرسٹیٹ بینک ڈاکٹررضاباقرآکھیے جو مہانگ تے حسابات جاریہ دے خسارے تے قابو پاوݨ ݙو وݙے چیلنجز ہن، گزریل کجھ مہینے اچ حکومت اتے سٹیٹ بینک دی طرفوں ملکی طلب کوں اعتدال تے گھن آوݨ کیتے جیڑھے زوردار اتے وختی اقدامات کیتے ڳئے ہن انہاں دے نتیجے اچ پاکستان مستقبل اچ انہاں چیلنجاں تے قابو پاوݨ اچ کامیاب تھیسی ۔ اے ڳالھ انہاں سعودی عرب دے دارالحکومت ریاض اچ روشن ڈجیٹل اکاونٹ تے پاکستانی برادری دے رلےانٹرایکٹو سیشن اچ ڳال مہاڑ اچ آکھی اے ۔گورنرسٹیٹ بینک روشن ڈجیٹل اکاؤنٹ اچ بھرپور تعاون کرݨ تے سعودی عرب اچ رہݨ آلے پاکستانیاں دا شکریہ ادا کیتے اتے آکھیے جو روشن ڈجیٹل اکاؤنٹ سعودی عرب اچ پاکستانی برادری اچ بے حد کامیاب ثابت تھئے جنہاں آر ڈی اے اچ شامل ہووݨ آلے 175 ملکاں اچ رہݨ آلے پاکستانیاں اچوں ساریں توں ودھ تعداد اچ اے اکاؤنٹس کھلوائے تے انہاں دے ڈپازٹس دی رقم ݙوجھے نمبر تے اچی اے ۔ تقریب اچ وݙی تعداد اچ سعودی عرب اچ رہݨ آلے پاکستانیاں، سعودی عرب اچ کم کرݨ آلی پاکستانی تنظیماں، اسٹیٹ بینک دی سینئر انتظامیہ تے پاکستانی سفارتخانے دے حکام شرکت کیتی۔ ڈاکٹر رضا باقر روشن ڈیجیٹل اکاونٹ تے ڳال مہاڑ کیتے تقریب منعقد کرݨ تے سعودی عرب اچ پاکستان دے سفیر لیفٹیننٹ جنرل (ر) بلال اکبر دا شکریہ ادا کیتے اتے آکھیے جو ایں تاریخی اقدام توں ٻاہرلے ملک پاکستانیاں کوں موقع ملیے او مکمل ڈجیٹل طریقے توں پاکستان اچ آپݨی بچت اتے سرمایہ کاری دی ضرورتاں پوریاں کرݨ کیتے بینک اکاؤنٹ کھول سڳن۔
