ملتان۔7فروری (اے پی پی):نامورناول نگار،ڈرامہ نگار اتے سابق رکن پنجاب اسمبلی بشریٰ رحمن سنوار دی سویل لاہور اچ انتقال کرڳئن ۔بشریٰ رحمن دا تعلق بہاولپورتوں ہئی لیکن او ملتان کوں آپݨا پیکہ آکھدیاں ہن ۔بشریٰ رحمن گورنمنٹ ڈگری کالج خواتین ملتان توں گریجوایشن کیتی تے کالج اچ بین الکلیاتی تقریری مقابلیں اچ انعام وی ڳھدے ۔بشری ٰرحمن 1962اچ ایف اے سیکنڈایئر دی طالبہ دی حیثیت توں گورنمنٹ کالج فارگرلزبہاولپوردی نمائندگی کیتے انٹرکالجیٹ تقریری مقابلے اچ شرکت کیتے پہلی واری ملتان آئیاں ہن ۔ اپݨے مضمون” ملتان میݙا پیکہ “اچ او لکھدیاں ہن میݙی زندگی دی پہلی کامیابی ،پہلا وقاراتے پہلا افتخار ملتان توں شروع تھیا تے ول ملتان میݙے دل اچ لہہ ڳیا ۔ایف اے دے بعد بشریٰ رحمن ایں کالج اچ تھرڈ ایئراچ داخلہ ڳھدا۔بشریٰ رحمن کالج میگزین” لالہ صحرائی “دی ایڈیٹروی رہ ڳیاں ۔انہاں کالج دی تقریبا ت اچ ھک ڈرامے اچ انارکلی دا کردار وی اداکیتا تے اڳلے سال خود وی ڈرامہ ”مہرالنساءاتے شہزادہ سلیم “لکھیا جیں اچ انہاں مہرالنساءدا کردار ݙتا ڳیا ۔بشریٰ رحمن گریجوایشن دے بعد اولڈ سٹوڈنٹ ڈے دی تقریبات دے سلسلے اچ وی ملتان آندیاں رہیاں ۔بعداچ 1984اچ انجمن ثقافت پاکستان دے زیراہتمام ملتان اچ انہاں دے نال پہلی واری شام منائی ڳئی۔بعداچ اومختلف تقریبات اچ شرکت کیتے وی ملتان آندی رہی ۔2011اچ انہاں دی کتاب” دانارسوئی “دی تعارفی تقریب وی ملتان اچ تھئی ۔بشریٰ رحمن چھیکڑی واری 2016اچ ڈاکٹرنجمہ شاہین کھوسہ دی کتاب”پھول خوشبواورتارہ“ دی تعارفی تقریب اچ شرکت کیتے ملتان آئیاں ہن ۔
